გასული წლის მიწურულს ჯიფსი როუზ ბლანჩარდი მსოფლიოს ყურადღების ცენტრში მოექცა. ოჯახში ძალადობის მსხვერპლი ამერიკელი ქალი, რომელიც საკუთარი დედის მკვლელობისთვის იხდიდა სასჯელს, დეკემბერში ვადაზე ადრე გაათავისუფლეს. მისი უჩვეულო ისტორია ჯერ საფუძვლად დაედო Hulu-ის 2019 წლის მინისერიალს The Act, სულ ახლახან კი გამოვიდა დოკუმენტური სერიალი ჯიფსი როუზ ბლანჩარდის აღიარებები საპატიმროში (The Prison Confessions of Gypsy Rose Blanchard).

მალევე ვიხილავთ კიდევ ერთ, ჯერჯერობით დაუსათაურებელ დოკუმენტურ სერიალს, რომელიც ამჯერად უკვე გათავისუფლებული ბლანჩარდის ცხოვრებას ასახავს.

"მიუნჰაუზენის დელეგირებული სინდრომის მსხვერპლ ჯიფსიზე დედა წლების განმავლობაში ძალადობდა, მან მთელი ცხოვრება ჯერ ერთ, მერე კი მეორე ციხეში გაატარა", — ვკითხულობთ გავრცელებულ პრესრელიზში, — "ახალი სერიალი მოგვითხრობს ჯიფსის, უკვე თავისუფალი ქალის, ცხოვრებაზე. ესაა გარდასახვის ამბავი, სადაც ჯიფსი თავისი თავის ვარსკვლავურ ვერსიასთან შეგუებას ცდილობს, ამავდროულად კი, 'ჩვეულებრივ' სამყაროში თავის ახალ პიროვნებას ქმნის: ცოლის, დის, შვილისა და, რაც მთავარია, თავისუფალი ქალის".

• ძალადობის მსხვერპლი ჯიფსი, რომელიც დედის მკვლელობისთვის ციხეში იყო, გაათავისუფლეს

ბლანჩარდმა 2015 წელს თავის პარტნიორთან ერთად დაგეგმა მკვლელობა, რომელსაც, როგორც ცნობილია, წინ მძიმე ისტორია უძღოდა: ქალის დედას მიუნჰაუზენის დელეგირებული სინდრომი ჰქონდა, რის გამოც სჯეროდა და შვილსაც აჯერებდა, რომ მას სხვადასხვა დაავადება აწუხებდა, შემდეგ კი შესაბამის სიმპტომებს სამედიცინო პროცედურებით ხელოვნურად იწვევდა.

ჯიფსის თქმით, როდესაც 7 წლის იყო, დედამისი ამტკიცებდა, რომ მას კუნთოვანი დისტროფია და ლეიკემია ჰქონდა, რის გამოც შვილს თავი გადაპარსა და ეტლით გადაადგილება დააწყებინა, მიუხედავად იმისა, რომ ჯიფსის სიარული შეეძლო.

ჯიფსის მტკიცებით, მაშინ სჯეროდა, რომ დედის მკვლელობის გარდა, სხვა გზა არ ჰქონდა. ის ჰყვება, რომ სახლიდან გაქცევა სცადა, მაგრამ დედამ მისი დაჭერა შეძლო. იურიდიულად, ჯიფსის მეურვე დედამისი იყო და მას დამოუკიდებლად არანაირი გადაწყვეტილების მიღება არ შეეძლო.

///

მკვლელობის თანამონაწილეობაში დადანაშაულებულმა ჯიფსი როუზმა მისჯილი 10 წლიდან საპატიმროში 8 წელი გაატარა, მის უკვე ყოფილ პარტნიორს კი ციხეში მთელი ცხოვრების გატარება მოუწევს.

საპატიმროდან გამოსვლამდე ჯიფსიმ ინტერვიუში თქვა, რომ დედის მკვლელობას ყოველდღე ნანობს და ფიქრობს, რომ მისი მოკვლის ნაცვლად, პოლიციისთვის უნდა მიემართა.

"უკან დაბრუნება რომ შემეძლოს, იქნებ ბავშვობაში ნათესავებისთვის მეთქვა, რომ სინამდვილეში არაფერი მჭირდა და დედა ავად ძალით მხდიდა. თუნდაც მხოლოდ იმ მომენტში რომ დავბრუნებულიყავი, როცა ნიკთან ერთად მისი მკვლელობა დავგეგმე და ამის ნაცვლად, ყველაფრის პოლიციისთვის თქმა გადამეწყვიტა. ამაზე ფიქრი მტანჯავს", — ამბობს ჯიფსი.

ჯიფსის თქმით, უნდა, ძალადობრივ ურთიერთობაში მყოფი სხვა ადამიანები დაარწმუნოს, რომ მკვლელობა არ ჩაიდინონ და სხვა ნებისმიერი გზა იპოვონ სიტუაციიდან თავდასაღწევად.