ბუკინგემის სასახლემ ცოტა ხნის წინ გაავრცელა ინფორმაცია იმის შესახებ, რომ გაერთიანებული სამეფოს მეფეს, ჩარლზ III-ს, სიმსივნე დაუდგინდა. განცხადების მიხედვით, მეფემ მკურნალობა უკვე დაიწყო, რის გამოც გარკვეული პერიოდის განმავლობაში საჯარო ვალდებულებების შესრულებას ვეღარ შეძლებს. ბუკინგემის სასახლის განცხადებაში არ არის დაკონკრეტებული მონარქს რა ტიპის და რომელი სტადიის სიმსივნე დაუდგინეს.

"მისმა უდიდებულესობამ დიაგნოზის გასაჯაროება სპეკულაციების თავიდან ასაცილებლად გადაწყვიტა. მისი უდიდებულესობა იმედოვნებს, რომ ეს ფაქტი სიმსივნით დაავადებული ადამიანების მიმართ საზოგადოების ემპათიას გაზრდის", — ნათქვამია ბუკინგემის სასახლის განცხადებაში.

შეგახსენებთ, რომ 1 თვის წინ ჩარლზ III-ს პროსტატის გამო ოპერაცია გაუკეთეს. როგორც ბუკინგემის სასახლეში აცხადებენ, საავადმყოფოში ყოფნის დროს მეფის ჯანმრთელობის სხვა პრობლემების შესახებაც გახდა ცნობილი.

ჩარლზ III მეფედ 2023 წლის 6 მაისს უესტმინსტერის სააბატოში აკურთხეს. ჩარლზ III გაერთიანებული სამეფოს მეფე მას შემდეგ გახდა, რაც მისი დედა, დედოფალი ელიზაბეთი, 96 წლის ასაკში გარდაიცვალა.