აზერბაიჯანული საინფორმაციო საიტი AbzasMedia მუშაობას ემიგრაციიდან გააგრძელებს, მიუხედავად იმისა, რომ აზერბაიჯანის ხელისუფლებამ მთელი მისი მმართველი გუნდი და რამდენიმე ჟურნალისტი დააპატიმრა.

ხუთშაბათს აბზასმა მთავარ რედაქტორად ვეტერანი აზერბაიჯანელი ჟურნალისტი ლეილა მუსტაფაევა დაასახელა.

"ხელისუფლებამ ამოწურა AbzasMedia-ს რესურსები, თანამშრომლების დაპატიმრებით და რეპრესიული გარემო შეუძლებელს ხდის აზერბაიჯანიდან მუშაობას", — ნათქვამია AbzasMedia-ს განცხადებაში. ისინი აქვე ამბობენ, რომ ახალი სარედაქციო გუნდი "გაფანტული იქნება ევროპის სხვადასხვა ქვეყანაში".

ლეილა მუსტაფაევა არის გამომძიებელი ჟურნალისტი, რომელიც ამჟამად გერმანიაში ცხოვრობს. მუსტაფაევა საყოველთაოდ ცნობილი გახდა ჟურნალისტური საქმიანობით მისი ქმრის, ჟურნალისტ აფგან მუხთარლის პატიმრობის გარემოებების შესახებ. მუსტაფაევამ პირველმა განაცხადა, რომ საქართველოს მთავრობა იყო თანამონაწილე მუხთარლის გატაცებისა და თბილისში დაკავებაში, აზერბაიჯანის მთავრობის ბრძანებით.

მუსტაფაევამ, ასევე, დააარსა Fakt Yoxla, მედია მონიტორინგის პროექტი.

განცხადებაში AbzasMedia-მ მხარდამჭერებს მადლობა გადაუხადა.

"გმადლობთ გაგებისა და მხარდაჭერისთვის ამ რთულ დროს. AbzasMedia მოწოდებული იქნება ზუსტი და მიუკერძოებელი ახალი ამბების მიწოდებაზე, ჟურნალისტური პრინციპების შენარჩუნებით, თუნდაც არსებულ პირობებში”, — ნათქვამია განცხადებაში.

მოგვიანებით, მუსტაფაევამ ფეისბუქზე დაწერა, რომ პირობას დებს, დაადასტუროს მათი საქმის სიმართლე.

მუსტაფაევამ, ასევე, განაცხადა, რომ რამდენიმე წამყვანი საერთაშორისო მედიაორგანიზაცია საფრანგეთის ForbiddenStories-ის ხელმძღვანელობით, შეთანხმდა დაეხმარონ AbzasMedia-ს მუშაობის გაგრძელებაში, მათ შორის, France 24, Guardian, Le Monde, OCCRP, Der Standard და სხვები.

ნოემბრის ბოლოს აზერბაიჯანის პოლიციამ AbzasMedia-ს ხუთი წევრი დააკავა და უცხოური ვალუტის კონტრაბანდაში დაადანაშაულა. მათ შორის იყვნენ დირექტორი და დამფუძნებელი ულვი ჰასანლი, მთავარი რედაქტორი სევინჯ ვაგიფქიზი, დირექტორის მოადგილე მაჰამედ კაკალოვი და ჟურნალისტები ჰაფიზ ბაბალი, ნარგიზ აბსალამოვა და ელნარა გასიმოვა.

მოგვიანებით, ნარკოტიკის ფლობის ბრალდებით დააკავეს ყოფილი პოლიციელი და უფლებადამცველი ილჰამიზ გულიევი, რომელმაც ინტერვიუ მისცა AbzasMedia-ს.

მას შემდეგ აზერბაიჯანის ხელისუფლებამ რამდენიმე ბლოგერიც დააკავა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.