მოკლედ: პროკურატურის მოთხოვნით, თბილისის საქალაქო სასამართლომ გიორგი ხასაიას და კაკო ჩიქობავას სასამართლო პროცესი დღეს, 18:30 საათისთვის ჩანიშნა.

დეტალები: მოძრაობა ხმის წევრმა ვაკო ნაცვლიშვილმა On.ge-ს უთხრა, რომ შესაძლოა, პროცესი აღკვეთის ღონისძიებას შეეხებოდეს.

  • გიორგი ხასაიას და კაკო ჩიქობავას აღკვეთის ღონისძიების სახით პატიმრობა 25 იანვარს შეეფარდათ.

სტრიქონებს შორის: კაკო ჩიქობავა და გიორგი ხასაია მხოლოდ ნაწილობრივ აღიარებენ ბრალდებას — აღიარებენ ნივთის დაზიანების ფაქტს, თუმცა, არ ეთანხმებიან ბრალდების იმ ნაწილს, სადაც საუბარია იმაზე, რომ ამას ჯგუფური ხასიათი ჰქონდა.

გაიგე მეტი: რა შემთხვევაში შეიძლება გაათავისუფლონ ჩიქობავა და ხასაია

კონტექსტი: კაკო ჩიქობავა და გიორგი ხასაია 23 იანვარს, კეკელიძის ქუჩაზე ხატიაშვილების საცხოვრებელი ბინიდან გამოსახლების პროცესისას დააკავეს, აღსრულების პოლიციის ავტომობილის დაზიანებისთვის.

  • პროკურორის ინფორმაციით, ბრალდებულებმა სახელმწიფო უწყებას 3 380 ლარის ოდენობის ზიანი მიაყენეს.
  • ორივე მათგანს 3-დან 6 წლამდე პატიმრობა ემუქრება.

ბოლო ხაზი: მოძრაობა ხმამ, რომელიც აქტიურად აპროტესტებს გასახლების პოლიტიკასთან დაკავშირებით სახელმწიფოს მიდგომებს, მარში დააანონსა 4 თებერვალს და ამბობენ, რომ დაკავებული ლექტორების გათავისუფლების მოთხოვნა ერთ-ერთი ძირითადი საკითხი იქნება.