მოკლედ: ვარკეთილის და ავლაბრის მეტროსადგურები, რეაბილიტაციის პროცესის დროს, არ დაიკეტება. ამის შესახებ On.ge-ს თბილისის სატრანსპორტო კომპანიამ განუცხადა.

• "მეტროსადგურებში რეაბილიტაციის პროცესი მგზავრთა გადაადგილებას ხელს არ შეუშლის", — გვითხრეს მათ.

On.ge-მ ასევე გაარკვია, რომ 2024 წლის მარტში, თბილისის სატრანსპორტო კომპანია უკვე მეორედ გაუხანგრძლივებს ხელშეკრულებას რეაბილიტაციაზე პასუხისმგებელ შპს ბადა ქონთრაქშენს.

სტრიქონებს შორის: 2022 წლის 19 ივლისს, თბილისის სატრანსპორტო კომპანიამ მეტროსადგურ ავლაბრის ზედა ვესტიბიულის რეკონსტრუქციისა და კაპიტალური სარემონტო სამუშაოებისთვის, პირდაპირი წესით გააფორმა ხელშეკრულება ბადა ქონსთრაქშენთან.

• თავდაპირველად, ხელშეკრულება ძალაში იყო 2023 წლის 15 ივლისამდე.
• საგულისხმოა, რომ მერიამ 2023 წლის 14 ივლისს კომპანიასთან დამატებით გააგრძელა ხელშეკრულების ვადა კიდევ 8 თვით — 2024 წლის 15 მარტამდე.

დეტალები: თბილისის სატრანსპორტო კომპანიის თქმით, ავლაბრის რეაბილიტაციის პროცესში "აუცილებელი კვლევების ჩატარება გახდა საჭირო", რომლის დამთავრებისთანავე, მეტროსადგურზე სამუშაოები განახლდება.

• მათივე თქმით, ვარკეთილის მეტროში სამუშაოები დაიწყება "პროექტში მცირე ცვლილებების შეტანის შემდეგ".
• თბილისის სატრანსპორტო კომპანია აღნიშნავს, რომ ვარკეთილის მეტროში "ბაქნის ქვედა სამუშაოები დღესაც მიმდინარეობს".

გაიგეთ მეტი: როგორ გამოიყურება მეტროსადგურები, რომელთა რეაბილიტაციის დასრულებას კალაძე ზაფხულის ბოლომდე გვპირდება

ბოლო ხაზი: 2024 წლის 1-ელ იანვარს თბილისის მერმა კახა კალაძემ განაცხადა, რომ ორი მეტროსადგურის — ვარკეთილის და ავლაბრის რეაბილიტაცია ზაფხულის ბოლოს დასრულდება. მისი თქმით,

• ვარკეთილის რეაბილიტაციის სურვილი, გარკვეული დროის განმავლობაში, არცერთმა კომპანიამ არ გამოთქვა და პროცესი ამიტომ გაიწელა.
• "თუმცა მოიძებნა კომპანია, რომელიც ამჟამად ასრულებს სამუშაოებს და რეაბილიტაცია ზაფხულის ბოლოსთვის დასრულდება“, — თქვა კალაძემ.

რა ვიცით კომპანიაზე, რომელმაც ორივე მეტროს რეაბილიტაცია ზაფხულის ბოლომდე უნდა დაასრულოს: ორივე მეტროსადგურის რეაბილიტაციას კომპანია ბადა ქონსთრაქშენი ახორციელებს.

ფლანგვის დეტექტორის ინფორმაციით, ბადა ქონსთრაქშენის მფლობელი ოცნების შემომწირველია.

• საჯარო რეესტრისა და პოლიტიკური ფინანსების მონიტორინგის მონაცემებითაც დასტურდება, რომ კომპანიის 100%-იანი წილის მფლობელი ბაჩანა ადამიაა, რომელმაც 2014 წელს მმართველ პარტიას 60 000 ლარი შესწირა.
• მეტროსადგურ ვარკეთილის რეაბილიტაციისთვის თბილისის სატრანსპორტო კომპანიასა და ბადა ქონსთრაქშენს შორის ხელშეკრულება 2022 წლის 21 დეკემბერს გაფორმდა.
• სამუშაოების შესასრულებლად ხელშეკრულება ძალაში 2024 წლის 22 სექტემბრამდეა.