რა ხდება: ქართული ოცნების ყრილობაზე ირაკლი კობახიძემ განაცხადა, რომ პარტიას 2012 წლის შემდეგ საზოგადოების ისეთი მაღალი ნდობა, როგორც ახლა აქვს, არ ჰქონია.

• ის დარწმუნებულია, რომ საპარლამენტო არჩევნებში ოცნება დიდი უპირატესობით გაიმარჯვებს.
• კობახიძემ, რომელიც პარტიამ დღეს ოფიციალურად წარადგინა პრემიერის კანდიდატად, თქვა, რომ "ქართული ოცნების ახდენაში საკუთარ წვლილს შეიტანს".

ვრცლად, რა თქვა პრემიერ-მინისტრობის კანდიდატმა

მადლობა გადაუხადა ბიძინა ივანიშვილს იმისთვის, რომ პრემიერ-მინისტრობის პოსტზე მისი კანდიდატურა დაასახელა.

"ბატონი ბიძინა ივანიშვილი თითოეული ჩვენგანისთვის არის იმის მაგალითი, თუ როგორ უნდა ემსახურო საკუთარ ქვეყანას. გასულ წლებში, გუნდის თითოეულმა წევრმა ჩადო თავისი წილი ძალისხმევა ჩვენი ქვეყნის წინსვლაში. თუმცა, აუცილებლად უნდა ითქვას - ის, რომ დღეს საქართველოს აქვს დემოკრატია, მშვიდობა, ეკონომიკური წინსვლა და ქვეყანამ მიიღო ევროკავშირის წევრობის კანდიდატის სტატუსი, პირველ რიგში, არის ბატონი ბიძინა ივანიშვილის დამსახურება. განსაკუთრებული მადლობა პარტიის დამფუძნებელს ამისათვის.

• გამოცხადებული ნდობისთვის, ასევე, მადლობას გადავუხდი ირაკლი ღარიბაშვილს, ასევე მას მინდა განსაკუთრებული მადლობა გადავუხადო სამწლიანი უაღრესად წარმატებული მოღვაწეობისთვის პრემიერ-მინისტრის თანამდებობაზე , რამაც ჩვენს ქვეყანას უპრეცედენტო წარმატება მოუტანა, უღრმესი მადლობა თქვენ. მადლობა პარტიის გენერალურ მდივანს, კახა კალაძეს, პარტიის პოლიტიკური საბჭოს თითოეულ წევრს, ყრილობის ყველა დელეგატს.
• ყველა ის მიღწევა, რომელიც ჰქონდა ჩვენს გუნდს და ქვეყანას უკანასკნელი წლების განმავლობაში, უპირველეს ყოვლისა, იყო გუნდის უპრეცედენტო ერთიანობის შედეგი. ამ ერთიანობისთვის მადლობა ეკუთვნის თითოეულ თქვენგანს - მთავრობის წევრებს, პარლამენტარებს, ადგილობრივი და რეგიონული ხელისუფლების წარმომადგენლებს, პარტიის რიგით წევრებს და მხარდამჭერებს.
• ამ თანამდებობის დაკავება განსაკუთრებული პასუხისმგებლობაა. ქვეყნის წინსვლა ახლა ჩვენს ერთიან ძალისხმევას მოითხოვს, ამ თვალსაზრისით გუნდის თითოეული წევრის იმედი მაქვს.
• წინ გველის მნიშვნელოვანი არჩევნები, რომელსაც მოსახლეობის ძლიერი მხარდაჭერის ფონზე ვხვდებით. ჩვენს პოლიტიკურ გუნდს საზოგადოების ასეთი მაღალი ნდობა 2012 წლის შემდეგ არ ჰქონია. დარწმუნებული ვარ, საპარლამენტო არჩევნებში ძალიან დიდი უპირატესობით გავიმარჯვებთ, რაც გახდება საფუძველი ქვეყნის შემდგომი წინსვლისა და განვითარებისთვის.
• ქართული ოცნება, პრაქტიკული თვალსაზრისით, ორი მთავარი მისიით შეიძლება იყოს გამოხატული — პირველი, ეს არის ფიზიკურად და სულიერად გამთლიანებული საქართველო; ეს არის საქართველო აფხაზეთითა და სამაჩაბლოთი, აფხაზებთან და ოსებთან ერთად. ეს არის საქართველო, სადაც ქართველებს შორის სიკეთე ძლევს ბოროტებას და სიყვარული ძლევს სიძულვილს.
• მეორე — ეს არის საქართველო ადამიანების კეთილდღეობის ევროპული დონით, საქართველო, სადაც არცერთი ადამიანი არ ცხოვრობს სიღარიბეში.
• გასული 3 წლის განმავლობაში ქართველმა ხალხმა გამოავლინა უდიდესი სიბრძნე, რამაც ამ ორი ამოცანის შესრულებასთან ბევრად უფრო დაგვაახლოვა. თითოეული ჩვენგანის ძალისხმევაა ამ ოცნების ახდენისკენ უნდა იყოს მიმართული.
• გაძლევთ პირობას, მთავრობის მეთაურის რანგში ყველაფერს გავაკეთებ, რომ ამ ოცნების ახდენაში ჩემი წვლილი შევიტანო."

პროცედურულად: ირაკლი კობახიძე სამთავრობო პროგრამას საქართველოს პარლამენტს ხვალ, 2 თებერვალს წარუდგენს.

• ხვალვე წარადგენს პარლამენტში მინისტრთა კაბინეტის განახლებულ შემადგენლობასაც.
• საქართველოს პარლამენტს ხვალიდან, 2 თებერვლიდან ექნება მომდევნო 2 კვირა იმისთვის, რომ ნდობა გამოუცხადოს პრემიერ-მინისტრობის ახალ კანდიდატსა და მინისტრთა კაბინეტს.

ვინ დარჩება მთავრობაში: ირაკლი კობახიძის თქმით, მინისტრის თანამდებობაზე დარჩენა შესთავაზეს მთავრობის ყველა წევრს.

• თუმცა მინისტრთა კაბინეტის დატოვების სურვილი მხოლოდ თავდაცვის მინისტრმა, ჯუანშერ ბურჭულაძემ გამოთქვა.
• "თავდაცვის მინისტრს სურდა სხვა სფეროში გადანაცვლება, რასაც, რა თქმა უნდა, ანგარიში გავუწიეთ", — თქვა კობახიძემ.
• მის შემცვლელად საქართველოს პარლამენტის ვიცე-სპიკერი, ირაკლი ჩიქოვანი დაასახელა.