საქართველოს პარლამენტის მიერ გავრცელებული ინფორმაციის მიხედვით, 29 იანვარს, ევროკავშირის 9 რეკომენდაციასთან დაკავშირებით სამუშაო შეხვედრა გაიმართება.

• შეხვედრა დილის 9 საათზე, საქართველოს პარლამენტშია დანიშნული.

ვინ დაესწრება:

• პარლამენტის თავმჯდომარე შალვა პაპუაშვილი,
• საპარლამენტო უმრავლესობის ლიდერი და პარტია ქართული ოცნების თავმჯდომარე ირაკლი კობახიძე,
• საპარლამენტო უმრავლესობისა და ოპოზიციის წევრები.
• გავრცელებულ ინფორმაციაში, ასევე, აღნიშნულია, რომ შეხვედრაზე მიწვეული არიან არასამთავრობო ორგანიზაციების წარმომადგენლებიც.

თუმცა, როგორც On.ge-ს პარლამენტში დაუდასტურეს, საქართველოს პარლამენტისგან ოფიციალური მიწვევა მიიღო არასამთავრობოების გაერთიანება საქართველოს ეროვნულმა პლატფორმამ, რომელიც აღმოსავლეთ პარტნიორობის სამოქალაქო საზოგადოების ინიციატივის ფარგლებში შეიქმნა და მონაწილეობს ევროკავშირის კანდიდატი ქვეყნის სტატუსის მინიჭებისთვის ევროკომისიის მიერ გაცემული 12 პრიორიტეტის შესრულებისთვის შექმნილ საპარლამენტო ჯგუფებში.

რატომ არის მნიშვნელოვანი სამუშაო შეხვედრაში არასამთავრობოების ჩართულობა: იმიტომ, რომ ევროკომისიისგან მიღებულ 9 პირობაში აღნიშნულია, რომ პირობების შესრულების პროცესი უნდა იყოს ინკლუზიური: "ვენეციის კომისიის რეკომენდაციების შესაბამისად, მნიშვნელოვანია გამჭვირვალე და ინკლუზიური პროცესის წარმართვა ოპოზიციური პარტიებისა და სამოქალაქო საზოგადოების ჩართულობით", — ვკითხულობთ დათქმებში.

ვინ არ იქნება შეხვედრაზე: საქმე ის არის, რომ არასამთავრობოთა გაერთიანებაში, სახელწოდებით — პლატფორმა, რომელსაც პარლამენტმა ხვალინდელ შეხვედრაზე დასწრებისთვის მიმართა, აღარ შედის რამდენიმე არასამთავრობო ორგანიზაცია, რომელთა საქმიანობას საზოგადოება კარგად იცნობს.

• მათ შორის არიან ორგანიზაციები, რომლებიც ხშირად აქვეყნებენ კვლევებს, სადაც მაღალი დონის კორუფციის, ადამიანის უფლებების დარღვევის ფაქტებისა და ხელისუფლების მაღალჩინოსანთა უფლებამოსილების ბოროტად გამოყენების შესაძლო ფაქტების შესახებ მიუთითებენ.
• არასამთავრობოების გაერთიანება პლატფორმა რამდენიმე ორგანიზაციამ დატოვა მას შემდეგ, რაც 2022 წლის აგვისტოში ქართულმა ოცნებამ საარჩევნო კოდექსის გადასინჯვის საკითხზე შექმნილ სამუშაო ჯგუფში ორგანიზაცია ISFED (სამართლიანი არჩევნებისა და დემოკრატიის საერთაშორისო საზოგადოება) არ მიიწვია.
• მაშინ ქართული ოცნების წევრმა, გივი მიქანაძემ განაცხადა, რომ ამ პროცესში მხოლოდ იმ ორგანიზაციებს შეუძლიათ მონაწილეობის მიღება, რომლებიც "ნეიტრალიტეტს" ინარჩუნებენ.
• ამაზე საქართველოში ევროკავშირის წარმომადგენლობამ ოფიციალური განცხადება გაავრცელა და აღნიშნა, რომ შესაბამის არასამთავრობო ორგანიზაციებს ყველა სამუშაო ჯგუფის საქმიანობაში მონაწილეობის შესაძლებლობა უნდა მიეცეს, მათ შორის, საარჩევნო რეფორმაზე მომუშავე ჯგუფის ჩათვლით.
• განცხადება გააკეთა აშშ-ის იმდროინდელმა ელჩმაც, კელი დეგნანმა.

მას შემდეგ, პლატფორმა დატოვეს ამ ორგანიზაციებმა:

• საერთაშორისო გამჭვირვალობა - საქართველო (TI),
• ინფორმაციის თავისუფლების განვითარების ინსტიტუტი (IDFI),
• დემოკრატიის კვლევის ინსტიტუტი (DRI),
• საქართველოს ახალგაზრდა იურისტთა ასოციაცია (საია)
• და სოციალური სამართლიანობის ცენტრი (SJC).

ორგანიზაციებმა, 2022 წლის 20 აგვისტოს განაცხადეს, რომ ქართული ოცნების გადაწყვეტილება უსამართლოა, დაუსაბუთებელი და ეწინააღმდეგება ევროკავშირის პირველ და მე-10 პრიორიტეტების სულისკვეთებას, რომლებიც დეპოლარიზაციას და გადაწყვეტილებების მიღების ყველა დონეზე, სამოქალაქო ორგანიზაციების ჩართვას მოითხოვს.

საგულისხმოა, რომ 2023 წლის 28 დეკემბერს On.ge-ზე გამოქვეყნებულ ვრცელ ინტერვიუში ორგანიზაცია საერთაშორისო გამჭვირვალობა - საქართველოს აღმასრულებელმა დირექტორმა, ეკა გიგაურმა თქვა, რომ იმის მიუხედავად, იქნება თუ არა მზად საქართველოს ხელისუფლება მათთან თანამშრომლობაზე, ისინი ყველა შემთხვევაში იმუშავებენ საკითხებზე, რასაც ევროკომისიისგან მიღებული 9 დათქმა მოიცავს.

• გიგაურთან ინტერვიუ ჩავწერეთ მას შემდე, რაც 2023 წლის 25 დეკემბერს მთავრობამ გამოაქვეყნა სამოქმედო გეგმა ევროკომისიის მიერ, საქართველოსთვის განსაზღვრული 9 პირობის შესასრულებლად.

ფრაგმენტი ინტერვიუდან: "ჩვენ, მიუხედავად იმისა, ისინი მზად იქნებიან თუ არა ჩვენთან თანამშრომლობაზე, ყველა შემთხვევაში ვიმუშავებთ იმ საკითხებზე, რაზეც ტრადიციულად ვმუშაობთ ხოლმე.

[...] ჩვენ, რა თქმა უნდა, მომავალშიც მივალთ საკომიტეტო განხილვებზეც და წარვადგენთ ჩვენს წინადადებებს საპარლამენტო ფორმატში. ჩვენ არ შეგვიწყვეტია მუშაობა და როგორც აქამდე მივდიოდით პარლამენტში და ვაცნობდით დეპუტატებს ჩვენს მოსაზრებებს იმ საკითხებზე, რაზეც გვიმუშავია, ასევე იქნება სამომავლოდაც.

და არამხოლოდ ხელისუფლებას, საზოგადოებასაც გავაცნობთ ჩვენს ხედვებს. აქ მე ვგულისხმობ ანტიკორუფციულ რეფორმას, იმიტომ, რომ ანტიკორუფციული სამსახურის შექმნის იდეა წლების წინ წამოვიდა ჩვენი ორგანიზაციიდან, შემდეგ კი, ყველა შემდგომი მოწვევის პარლამენტში სხვადასხვა სახით გვქონდა წარდგენილი საკანონმდებლო ინიციატივები და სხვადასხვა წინადადებით მივმართავდით პარლამენტს ანტიკორუფციული სამსახურის შექმნასთან დაკავშირებით. ამიტომ ეს ის საკითხია, რომელიც კარგად ვიცით და შესაბამისად, რა თქმა უნდა, დავწერთ იმას, თუ რა არის დასამატებელი, რა არის შესაცვლელი დღეს არსებულ სისტემაში და განსაკუთრებით, სწორედ, ანტიკორუფციული სამსახურის თვალსაზრისით.

რაც შეეხება საპარლამენტო ზედამხედველობას, იცით, რომ ჩვენ შევიტანეთ წინადადება პარლამენტში და შევეცდებით, რომ გავაგრძელოთ ამის საკითხის ადვოკატირება, რომ იქნებ, სამუშაო ჯგუფი მაინც შეიქმნას. ასე თუ ვერ მოხდება, ამაზეც ვაცნობებთ საზოგადოებას", — გვითხრა გიგაურმა.

გაიგე მეტი: როგორ შეიძლება შეცვალოს 9 დათქმის შესრულებამ გარემო რიგითი მოქალაქისთვის — ინტერვიუ ეკა გიგაურთან