ინციდენტში მონაწილეობდნენ ვოსტოკ-ახმატის ბატალიონის წევრები. დაპირისპირება, გავრცელებული ინფორმაციით, რუსეთის მიერ ოკუპირებულ ქალაქ მელიტოპოლში მოხდა. მიზეზი რუსი ოფიცრის მცდელობა იყო, მანქანაში მსხდომი ჯარისკაცებისთვის საბუთები შეემოწმებინა.

Telegram-ზე გავრცელებულ კადრებში ჩანს რუსი ჯარისკაცი, რომელიც აჩერებს რამდენიმე მანქანას, მათ შორის, შავი ფერის მერსედესს, რომლითაც ჩეჩენი ჯარისკაცები გადაადგილდებოდნენ.

ვიდეოკადრებში ოფიცერი ეკითხება მანქანაში მსხდომებს, არიან თუ არა ისინი სამხედრო მოსამსახურეები და საბუთებს სთხოვს. შემდეგ, ოფიცერი აცხადებს, რომ მათი საბუთების თარიღი და მოქმედების ვადა არ იყო სწორი, რაზეც ჩეჩენი ჯარისკაცი აცხადებს, რომ მათ საშვს "განუსაზღვრელი ვადა" აქვს.

"არ მაინტერესებს, რას ითვლი. ბატალიონის მეთაური ვარ, პოლკის მეთაურმა მომცა [საბუთი]", — თქვა ერთ-ერთმა პირმა, რომელიც მანქანაში იჯდა.

ამის შემდეგ ოფიცერმა მათ მოსთხოვა, შემოებრუნებინათ მანქანა და გაჩერებულიყვნენ.

კადრებში ჩანს, რომ რამდენიმე ჯარისკაცი გადმოდის მანქანიდან, ისინი პისტოლეტებს ურტყამენ ოფიცერს და აყენებენ სიტყვიერ შეურაცხყოფასაც.

რუსული ანტისამთავრობო ტელეგრამ-არხის VChK-OGPU-ს ცნობით, კადრებში ჩეჩნეთის ხელმძღვანელის, რამზან კადიროვის პირადი დაცვის წევრები ჩანან. მათ ამოიცნეს ბატალიონის მეთაური ვახა "ასხაბ" ხამბულატოვიც, რომელიც ოდესღაც ჩეჩნეთის დამოუკიდებლობის მტკიცე მხარდამჭერი იყო. მათი თქმით, ხამბულატოვს ჯერ კიდევ აქვს "ნეგატიური დამოკიდებულება ფედერაციების მიმართ".

მომხდართან დაკავშირებით ოფიციალური კომენტარები, ჯერჯერობით, არ გაკეთებულა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.