რა ხდება: დაკავებულია ჟურნალისტი და გამოცემა მთის ამბების რედაქტორი, გელა მთივლიშვილი. ის სამართალდამცავებმა დააკავეს თბილისში, კეკელიძის #1-ში ხატიაშვილების ოჯახის გამოსახლების პროცესის გაშუქებისას. ფაქტს საქართველოს ჟურნალისტური ეთიკის ქარტია ეხმაურება.

დეტალები: ქარტიის განცხადების მიხედვით,

  • ჟურნალისტი აღსრულების პოლიციის მიერ კეკელიძის ქუჩაზე საცხოვრებელი კორპუსიდან ხატიაშვილების ოჯახის გამოსახლების პროცესს აშუქებდა, რა დროსაც ის პოლიციისადმი დაუმორჩილებლობის მოტივით დააკავეს.
  • "როგორც ქარტიისთვის ცნობილია, ადვოკატს, რომელიც სოციალური სამართლიანობის ცენტრს წარმოადგენს, გელა მთივლიშვილმა უთხრა, რომ დაკავებისას პოლიციელებმა მისი მოგუდვა სცადეს", — წერს ორგანიზაცია გავრცელებულ განცხადებაში და კატეგორიულად გმობს გელა მთივლიშვილისათვის თავისუფლების უკანონოდ აღკვეთისა და მასზე ფიზიკური ძალადობის ფაქტს.
  • ქარტია მოუწოდებს სამართალდამცავ უწყებებს, დაუყოვნებლივ გაათავისუფლონ დაკავებული ჟურნალისტი, ასევე, სასწრაფოდ გამოიძიონ მისი დაკავებისას პოლიციელების მიერ ძალის გადამეტების ფაქტი.
  • საქართველოს ჟურნალისტური ეთიკის ქარტია პოლიციას შეახსენებს მის ვალდებულებას, ჟურნალისტებს შეუქმნას უსაფრთხო გარემო მუშაობისას.

შსს-ს ოფიციალური ინფორმაციის თანახმად, სამართალდამცავებმა, მთლიანობაში, 20 პირი დააკავეს:

  • 2 პირი აღსრულების ბიუროს პოლიციის დაზიანებისთვის,
  • 18 — პოლიციელის კანონიერი მოთხოვნის დაუმორჩილებლობის საბაბით.

შსს-ს განცხადებაში არაფერია ნათქვამი პროფესიული საქმიანობის შესრულებისას დაკავებული ჟურნალისტის თაობაზე.

დღესვე, იმავე პროცესის გაშუქებისას, პოლიციელმა ონალინ-პლატფორმა მაუწყებლის ჟურნალისტი, რატი რატიანი, უხეში ძალის გამოყენებით ძირს ჩააგდო და საფრთხე შეუქმნა მის ჯანმრთელობასა და სიცოცხლეს.

ფოტო: კადრი თათა ვერულაშვილის ფეისბუქ-ვიდეოდან

გაიგე მეტი: ქარტია — პოლიციელმა ჟურნალისტი უხეში ძალის გამოყენებით ძირს ჩააგდო და საფრთხე შეუქმნა მის ჯანმრთელობასა და სიცოცხლეს