სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.

OC Media-ს რედაქცია ამჯობინებს, არ გამოიყენოს ისეთი ტერმინები, როგორიცაა "დე ფაქტო", "არაღიარებული" ან "ნაწილობრივ აღიარებული", როდესაც სტატია ეხება ოკუპირებულ აფხაზეთს ან ე.წ. სამხრეთ ოსეთს, ასევე, მთიან ყარაბაღს. ეს არ ასახავს რედაქციის პოზიციას მათ სტატუსთან დაკავშირებით.

აფხაზეთის უშიშროების საბჭოს ხელმძღვანელმა განაცხადა, რომ რუსული საზღვაო ბაზა აფხაზეთში, უკვე მიმდინარე წელს შეიძლება ამოქმედდეს.

სერგეი შამბამ რუსულ სახელმწიფო საინფორმაციო სააგენტო "რიას" 12 იანვარს უთხრა, რომ ოჩამჩირეში დაგეგმილი პორტის მშენებლობა ჯერ კიდევ დიზაინის შედგენის ეტაპზეა. მან, ასევე, განაცხადა რომ ბაზა აფხაზეთის უსაფრთხოებას უზრუნველყოფს.

"2008 წლიდან ჩვენ არ გვქონია არანაირი ინციდენტი ზღვაზე გემების ჩამორთმევასთან დაკავშირებით, სიტუაცია სასაზღვრო ზონაში მშვიდია“, — განაცხადა შამბამ.

აფხაზეთის პრეზიდენტმა ასლან ბჟანიამ ბაზის მშენებლობის შესახებ პირველად 2023 წლის ოქტომბერში განაცხადა. უკრაინაში სრულმასშტაბიანი შეჭრის შემდეგ, რუსეთის შავი ზღვის ფლოტი, რომლის შტაბ-ბინა ოკუპირებულ ყირიმშია, არაერთხელ გახდა უკრაინული თვითმფრინავების და რაკეტების სამიზნე.

ბჟანიას მიერ საზღვაო ბაზის შესახებ განცხადების შემდეგ, უკრაინის პრეზიდენტმა ვოლოდიმირ ზელენსკიმ თქვა, რომ დაარტყამს აფხაზეთში განლაგებულ რუსულ სამხედრო ხომალდებს.

"რუსეთის ლიდერი იძულებული გახდა გამოეცხადებინა ახალი ბაზის შექმნის შესახებ შავი ზღვის ფლოტისთვის […] რაც შეიძლება შორს უკრაინული რაკეტებისა და საზღვაო თვითმფრინავებისგან, მაგრამ ჩვენ მათ ყველგან მივწვდებით“, — თქვა ზელენსკიმ.

ამის საპასუხოდ, ბჟანიამ უკრაინა დაადანაშაულა იმაში, რომ სურს "კავკასიაში სამხედრო სიტუაციის პროვოცირება და ახალი სისხლიანი ომის დაწყება“.

ბაზა გააპროტესტეს ქართველმა ოფიციალურმა პირებმაც, თუმცა, რუსული სახელმწიფო მედიასაშუალება "სპუტნიკის" ჟურნალისტი, ალექსანდრე ხროლენკო წერს, რომ რუსეთი "არ აპირებს ვინმეს დაემუქროს“ ამ საზღვაო ბაზიდან. ის, ასევე, აღნიშნავს, რომ ბაზა თბილისიდან 300 კილომეტრის დაშორებით განთავსდება.

ოჩამჩირის პორტი 2009 წლიდან რუსეთის კონტროლის ქვეშაა; მას რუსეთი იყენებს მისი გემებისა და ნავების ასაშენებლად, პორტს რუსული საზღვრის დაცვა იცავს.