მოკლედ: მთავრობის ინფორმაციით, უსახლკარო, მძიმე საცხოვრებელ პირობებში მყოფი მრავალშვილიანი ოჯახებისთვის შემუშავებული პროგრამის ფარგლებში, 1000-მდე ოჯახს ახალ საცხოვრებელ ფართებს გადასცემენ.

  • პროგრამის ჯამური ბიუჯეტი 50 000 000 ლარს შეადგენს;
  • საკითხი დღეს, 8 იანვარს, მთავრობის ადმინისტრაციაში, სხდომაზე განიხილეს.

ვის შეუძლია პროგრამით სარგებლობა: პროგრამის ბენეფიციარი შეიძლება იყოს

  • ოჯახი 3 და მეტი არასრულწლოვანი ბავშვით, რომლის ყველა წევრი რეგისტრირებულია სოციალური მომსახურების სააგენტოს სოციალურად დაუცველი ოჯახების მონაცემთა ერთიან ბაზაში;
  • ოჯახი, რომლის არცერთი წევრი რეგისტრირებული არ არის დევნილთა, ეკომიგრანტთა და საარსებო წყაროებით უზრუნველყოფის სააგენტოს დევნილთა ან ეკომიგრანტი ოჯახების ერთიან ელექტრონულ მონაცემთა ბაზაში;
  • უსახლკარო ოჯახი, რომლის არცერთ წევრს სახელმწიფოსგან უკვე მიღებული არ აქვს საცხოვრებელი ფართი, ან სათანადო ფულადი კომპენსაცია საცხოვრებელი ფართის შესაძენად.

ბოლო ხაზი: პროგრამა 2025 წლის ბოლომდე გაგრძელდება.

  • მთავრობის ადმინისტრაციის ინფორმაციით, ოჯახების განსახლება განხორციელდება საქართველოს ნებისმიერ ადმინისტრაციულ-ტერიტორიულ ერთეულში.