მოკლედ: საქართველოს კულტურული მემკვიდრეობის დაცვის ეროვნული სააგენტო სიცრუეს უწოდებს გავრცელებულ ინფორმაციას, რომ ნიკორწმინდის ტაძრის ფასადის ქვას საფრთხე ემუქრება.

დეტალები: სააგენტო ფეისბუქზე წერს, რომ ამბროლაურში, სოფელ ნიკორწმინდაში მდებარე წმ. ნიკოლოზის სახელობის ტაძარში სრული რესტავრაცია-რეაბილიტაცია, მათი დაკვეთით, 2018 წელს ჩატარდა.

  • სამუშაოები შპს "ხელოვნების ნიმუშთა კონსერვაციის ცენტრმა“ შეასრულა.
  • ხელშეკრულებით გათვალისწინებული იყო შემდეგი სამუშაოები: ტაძრის სახურავიდან თუნუქის ბურულის მოხსნა და ჩანაცვლება სპილენძის ფურცლებით, სარკმლებისა და კარების შეცვლა, ქვის საკონსერვაციო სამუშაოები, ინტერიერში ნალესობისა და ფერწერის რესტავრაცია, ელექტრო სამონტაჟო სამუშაოები და სამრეკლოს რეაბილიტაცია.
  • სამუშაოების ღირებულებამ შეადგინა 946175 ლარი.
  • სააგენტომ ბოლოს 2023 წლის აგვისტოში შეამოწმა ტაძრის გადახურვის, ექსტერიერის და ინტერიერის მდგომარეობა.
  • "მონიტორინგის შედეგად დადგინდა, რომ გარდა მცირე დაზიანებებისა, ძეგლის მდგომარეობა დამაკმაყოფილებელია. ტაძარს არ აქვს სტრუქტურული პრობლემები, ინტერიერში არ ხდება წყლის ინფილტრაცია და ვიზუალური დათვალიერებით კედლის მხატვრობის მდგომარეობის გაუარესება არ შეინიშნება. შესაბამისად, გავრცელებული ინფორმაცია, რომ ძეგლს საფრთხე ემუქრება და არის განადგურების რისკის ქვეშ, არ შეესაბამება სიმართლეს", — წერია განცხადებაში.

ბოლო ხაზი: ნიკორწმინდის ტაძრის კედლის დაზიანების შესახებ ინფორმაცია ორგანიზაცია "ევროპა ჩვენი სახლიას" წარმომადგენელმა, თორნიკე ბარათაშვილმა გაავრცელა.

  • ის წერს, რომ სასწრაფოდ საყურადღებოა ნიკორწმინდის უნიკალური ტაძრის ფასადის ქვის მდგომარეობა, რადგან უამინდობის დროს სველდება.
  • ბარათაშვილმა, ასევე, გაავრცელა ფოტო და ვიდეომასალა, სადაც, მისი განმარტებით, ტაძრის დაზიანებები ჩანს.