მოკლედ: საქართველოს კონკურენციის ეროვნულმა სააგენტომ, ფარმაცევტულ სექტორში, 4 კომპანია კონკურენციის საწინააღმდეგო ქმედების გამო დააჯარიმა.

  • ეს კომპანიებია ავერსი, გეფა, პსპ, მერმისი.
  • სააგენტოს ინფორმაციით, მათ ონკოლოგიური მედიკამენტების სახელმწიფო დაფინანსების პროგრამის ფარგლებში, კონკურენციის შესახებ კანონი დაარღვიეს.

რა მოიკვლია კონკურენციის ეროვნულმა სააგენტომ: დაადგინეს, რომ 2021-2023 წლებში, ამ კომპანიებმა, ონკოლოგიური მედიკამენტების სახელმწიფო დაფინანსების პროგრამის ფარგლებში ფასების ფიქსაცია მოახდინეს.

  • იდენტიფიცირებულ იქნა 42 მედიკამენტი, სადაც 4 კომპანიის მიერ ადგილი ჰქონდა იდენტურ ფასწარმოქმნას.
  • კერძოდ, კომპანიების მიერ სამინისტროს დახურულ პორტალზე წარდგენილი ფასები 1 თეთრის სიზუსტით ემთხვეოდა ერთმანეთს.

სააგენტომ გამოავლინა იდენტური ფასის 88 შემთხვევა, რაც მოიცავს:

  • 23 შემთხვევას 2 კომპანიის მონაწილეობით
  • 47 შემთხვევას 3 კომპანიის მონაწილეობით
  • 18 შემთხვევას 4 კომპანიის მონაწილეობით

ავერსის შემთხვევაში, ადგილი ჰქონდა იდენტური ფასის 74 ფაქტს, გეფას (ჯი პი სი, ფარმადეპო) შემთხვევაში, ასევე 74 ფაქტს, პსპ-ს შემთხვევაში — 81 ფაქტს და მერმისის შემთხვევაში — 29 ფაქტს.

სააგენტოს შეფასებით, ეს კონკურენციის კანონმდებლობის მძიმე ფორმის დარღვევაა.

შესაბამისად, სააგენტოს გადაწყვეტილებით, კომპანიებს ჯამში 53 მილიონ ლარამდე ჯარიმა დაეკისრათ:

  • ავერსი: 14 402 425 ლარი;
  • გეფა: 20 349 336 ლარი;
  • პსპ: 17 094 872 ლარი;
  • მერმისი: 951 301 ლარი.

როგორ აფასებს მოკვლევის შედეგებს ჯანდაცვის მინისტრი: ზურაბ აზარაშვილის თქმით, ამ კომპანიების ქმედებების გამო, ონკოლოგიურ მედიკამენტებზე ფასები 3-4-ჯერ გაიზარდა.

  • "ონკოლოგიურ მედიკამენტებზე წლიური ლიმიტი გვაქვს და სწორედ იმ ლიმიტიდან ხდებოდა ამ თანხების გახარჯვა და ადამიანები მედიკამენტების გარეშე რჩებოდნენ“,— თქვა ზურაბ აზარაშვილმა.
  • მან თქვა, რომ ბრალდება ძალიან მძიმეა.

რას ამბობენ დაჯარიმებული კომპანიები: ისინი არ ეთანხმებიან მოკვლევის შედეგებს და ოთხივე მათგანი გეგმავს, გადაწყვეტილება სასამართლოში გაასაჩივროს.

  • ამის შესახებ ნათქვამია ფარმაცევტული კომპანიების ასოციაციის განცხადებაში.

"იმედს ვიტოვებთ, სამართლიანი სასამართლოს პირობებში, ყველა კომპანია შეძლებს სიმართლის დამტკიცებას", — ნათქვამია განცხადებაში.