გავრცელებული ინფორმაციით, კაცი, რომელიც, სავარაუდოდ, გიუმრიში გაიტაცეს, რუსეთის ქალაქ დონის როსტოვშია გადაყვანილი, მიუხედავად ისომხეთის ხელისუფლების მტკიცებისა, რომ არაფერი იცოდნენ მისი დაკავების, ან — ქვეყნიდან წასვლის შესახებ.

სამშაბათს, პროექტმა "იდიტე ლესომ" (იარეთ ტყით), რომელიც შექმნილია რუსების დასახმარებლად, რათა თავიდან აირიდონ სამხედრო გაწვევა, განაცხადა, რომ დიმიტრი სეტრაკოვი იმყოფებოდა სამხრეთ სამხედრო ოლქის რეგიონულ სამხედრო პოლიციის სამმართველოში.

განცხადებაში, ასევე, ნათქვამია, რომ ეძებენ ადვოკატს, რომელიც სეტრაკოვს რუსეთში დაიცავს.

ჯგუფის ცნობით, სეტრაკოვი 6, ან 7 დეკემბერს, რუსეთის სამხედრო პოლიციის წევრებმა გაიტაცეს, რომლებიც მას სომხეთის სამხედრო პოლიციის წარმომადგენლებად გაეცნენ.

როგორ გადაიყვანეს სეტრაკოვი რუსეთში, უცნობია.

ოთხშაბათს სომხეთის ხელისუფლებამ უარყო სეტრაკოვის ექსტრადირება, გენერალური პროკურორის მრჩეველმა ლუსინე მარტიროსიანმა განაცხადა, რომ მათ არ მიუღიათ და არ განუხილავთ მოთხოვნა და არც ნებართვა გაუციათ დიმიტრი სეტრაკოვის დაპატიმრების, დაკავების და მისი რუსეთისთვის გადაცემის შესახებ.

"სომხეთის რესპუბლიკის გენერალურ პროკურატურას არ აქვს ინფორმაცია რუსეთის ფედერაციის კომპეტენტური ორგანოების მიერ დიმიტრი სეტრაკოვის საქმეზე გამოძიების შესახებ, ისევე, როგორც იმის შესახებ, თუ როგორ აღმოჩნდა სეტრაკოვი სომხეთის ტერიტორიაზე", — თქვა მარტიროსიანმა.

სომხეთის ეროვნული უსაფრთხოების სამსახური არ პასუხობს კითხვას, თუ როგორ შეეძლო სეტრაკოვს საზღვრის გადაკვეთა ისე, რომ მათ ამის შესახებ ინფორმაცია არ ჰქონოდათ.

გავრცელებული ინფორმაციით, სეტრაკოვი სომხეთში ნოემბრის ბოლოს გადავიდა, რათა თავიდან აეცილებინა უკრაინაში წასვლა. ბელორუსული საინფორმაციო გამოშვება Vot Tak იტყობინება, რომ სეტრაკოვს 10 წლამდე თავისუფლების აღკვეთა ემუქრება, თუ დეზერტირობისთვის დამნაშავედ ცნობენ.

სომხეთის ხელისუფლების "საყოველთაო დუმილი"

სეტრაკოვის სავარაუდო გატაცებამ და რუსეთში გადაყვანამ გააჩინა კითხვები ხელისუფლების მზადყოფნის შესახებ, დაუპირისპირდეს ქვეყანაში დისლოცირებული რუსული ჯარების მიერ ჩადენილ უკანონობას.

ადგილობრივი უფლებადამცველი ჯგუფის, ჰელსინკის მოქალაქეთა ასამბლეის — ვანაძორის ხელმძღვანელმა, არტურ საქუნცმა დაგმო ფაქტი, რომ ოფიციალურ დონეზე "გონივრული ახსნა-განმარტება არ გაკეთებულა".

"გაოგნებული ვარ, პოლიტიკურ დონეზე, ეროვნული ასამბლეის [პარლამენტის], სამართალდამცავი ორგანოების დონეზე საყოველთაო დუმილით, რომ მათ ეს არ მიიჩნიეს სომხეთის რესპუბლიკის უსაფრთხოების ხელყოფად“, - განაცხადა საქუნცმა სამშაბათს ინტერვიუში ლევონ ბარსეღიანთან.

საქუნცის თქმით, მან უშიშროების სამსახურს ჰკითხა, რა გარემოებებით დატოვა სეტრაკოვმა ქვეყანა.

"რა დოკუმენტები და დასაბუთებები იყო წარმოდგენილი? [სეტრაკოვმა] საზღვარი დამოუკიდებლად გადაკვეთა, მაგრამ საზღვრის მეორე მხარეს დაიჭირეს? არსებობს თუ არა ეროვნული უსაფრთხოების სამსახურის სასაზღვრო დაცვა?“ - იკითხა მან.

სეტრაკოვის რუსეთში გადაყვანამდე ერთი დღით ადრე, საქუნცმა მიმართა ხელისუფლებას, მიეღოთ ზომები და "დაეხურათ ტრანსპორტირების ყველა შესაძლო არხი, სეტრაკოვის შესაძლო უკანონო გადაყვანის აღსაკვეთად".

საქუნცმა, მანამდე, მოუწოდა პროკურატურას, ბრალი წაეყენებინა სეტრაკოვის გატაცებაში მონაწილე რუსი ოფიცრებისთვის.

პროკურატურამ უპასუხა, რომ სეტრაკოვის საქმე სამართალდამცავ ორგანოებს გადაეცათ, მისი გაუჩინარების გარემოებების შესამოწმებლად.

სომხეთის საგამოძიებო კომიტეტში აცხადებენ, რომ მათ საქუნცის განცხადება "შეისწავლეს", მაგრამ ჯერ არ უთქვამთ, აპირებენ თუ არა გამოძიების დაწყებას.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.