მოკლედ: სამოქალაქო პლატფორმამ არა ფობიას წარადგინა ანგარიში, სახელწოდებით თანასწორობის პოლიტიკა საქართველოში სიძულვილით მოტივირებული დანაშაულის ფონზე.

• დოკუმენტში ხელისუფლების წარმომადგენლებს მოუწოდებენ, თავად არ გაატარონ დისკრიმინაციის ხელშემწყობი რიტორიკა და მხარი დაუჭირონ ყველა ადამიანის თანასწორობის პატივისცემას.

რატომ არის ეს მნიშვნელოვანი: ანგარიშის მომზადებისას, ავტორებმა აქცენტი გააკეთეს ევროკავშირის მიერ, საქართველოსთვის გაცემული 12 პრიორიტეტიდან იმ პარამეტრებზე, რომელიც მედიის წარმომადგენლების, ქალებისა და სხვა მოწყვლადი ჯგუფების დაცვას ეხება.

• "ევროპული კომისიის შეფასებით, მედიასა და მოწყვლად ჯგუფებთან დაკავშირებული პრიორიტეტები ბოლომდე ჯერ არ შესრულებულა, შესაბამისად, ეს საკითხები ჯერ კიდევ აქტუალურია და მათზე მუშაობა უნდა გაგრძელდეს ევროინტეგრაციის პროცესის წარმატებისთვის და შემდეგ ეტაპზე გადასასვლელად", — ვკითხულობთ დოკუმენტში.

ძირითადი მიგნებები: ანგარიშის ავტორი ორგანიზაციები — საქართველოს დემოკრატიული ინიციატივა, საია, ტოლერანტობისა და მრავალფეროვნების ინსტიტუტი და თანასწორობის მოძრაობა, მიიჩნევენ, რომ:

• სახელმწიფო არ ზრუნავს თანასწორუფლებიანობის უზრუნველყოფაზე და არ დგამს საკმარის ნაბიჯებს სიძულვილით მოტივირებულ დანაშაულებთან საბრძოლველად მედიის წარმომადგენლების, პოლიტიკურად აქტიური მოქალაქეებისა თუ ლგბტქი+ ადამიანების უფლებების მიმართ: "მეტიც, ხშირ შემთხვევაში, სახელმწიფო, საკუთარი ქმედებებითა და უმოქმედობით, თავად არის ასეთი დანაშაულების გახშირების გამომწვევი", — ამბობს კვლევა.

ასევე, ანგარიშის მიხედვით:

• სიძულვილით მოტივირებული დანაშაულების პრევენცია და გამოძიება არაეფექტიანია;
• მოწყვლად ჯგუფებს სამართალდამცავთა მიმართ ნდობის ნაკლებობა აქვთ;
• სიძულვილით მოტივირებულ დანაშაულებებზე წარმოებულ სტატისტიკას ხარვეზები აქვს;
• სახელმწიფოს სავარაუდო კავშირები აქვს სიძულვილით მოტივირებულ დანაშაულებებთან;
• ლგბტქი+ თემის უგულვებელყოფა ხდება თანასწორობის პოლიტიკის დონეზე;
• არსებული დისკრიმინაციული ჩანაწერების გამოსწორების ნაცვლად, ახალი დისკრიმინაციული ნორმების შემოღებით, კანონმდებლობის გაუარესება ხდება.

რეკომენდაციები:

• საგამოძიებო უწყებებს: სიძულვილით მოტივირებული სავარაუდო დანაშაულები გამოიძიონ ეფექტიანად.
• უზენაეს სასამართლოს, პროკურატურასა და შინაგან საქმეთა სამინისტროს: გააუმჯობესონ სიძულვილით მოტივირებულ დანაშაულებზე სტატისტიკის წარმოება, მათ შორის, უფრო სრულყოფილი მონაცემების ასახვით.

საქართველოს მთავრობას:

• ადამიანის უფლებათა სამოქმედო გეგმაში ასახოს ლგბტქი+ თემის წინაშე არსებული გამოწვევები და დასახოს მათი გადასაჭრის გზები;
• იმავე გეგმაში, მედიაეკოსისტემის სიტუაციური ანალიზის მიხედვით განისაზღვროს პრევენციული ზომები მედიის წარმომადგენლების მიმართ ძალადობის წინააღმდეგ;
• ადამიანის უფლებათა სამოქმედო გეგმაზე მუშაობის პროცესი იყოს ინკლუზიური.
• ასევე, მთავრობას მოუწოდებენ, შეიმუშაოს სიძულვილით მოტივირებულ დანაშაულებზე პრევენციისა და რეაგირების ერთიანი სტრატეგია, ყველა დაინტერესებული მხარის ჩართულობითა და მოსაზრებების გათვალისწინებით.

ბოლო ხაზი: ანგარიში, ძირითადად, ეფუძნება 2021-2022 წლებსა და 2023 წლის პირველ ნახევარში განვითარებული მოვლენების ანალიზს და ეყრდნობა სამოქალაქო პლატფორმა არა ფობიას! ორგანიზაციების წარმოებაში არსებული საქმეების შეფასებას, მათ ანგარიშებს, საჯარო ინფორმაციის გამოთხოვის გზით მიღებულ პასუხებს, ასევე, საჯაროდ ხელმისაწვდომ სხვა ინფორმაციას და სტატისტიკას.