რა ხდება: ჰამასის ლიდერი, ისმაილ ჰანიე ქაიროში ჩავიდა. ის მოლაპარაკებებს გამართავს ეგვიპტის მაღალჩინოსნებთან.

დეტალები: მოლაპარაკებების თემა ღაზაში მიმდინარე ომი იქნება. მხარეებმა მორიგი ზავის შესაძლებლობაზე დაიწყეს საუბარი.

ჰანიეს დაგეგმილი აქვს შეხვედრა ეგვიპტის დაზვერვის ხელმძღვანელთან, აბას ქამელთან და სხვა მაღალჩინოსნებთან, რათა ისაუბრონ ომის შეწვეტაზე და მომზადდეს შეთანხმება, ისრაელის ციხეებიდან პალესტინელი პატიმრების გამოშვების შესახებ.

ისრაელის პრეზიდენტმა ისააკ ჰერცოგმა განაცხადა, რომ მისი ქვეყანა მზად არის მორიგი ჰუმანიტარული პაუზისთვის ღაზაში, თუ ტყვეებს გაათავისუფლებენ.

მსგავსი თემა: ისრაელმა ჰამასის ლიდერის სახლი დაბომბა — რა ჩანს ვიდეოკადრებში

რა ვიცით ისმაილ ჰანიეზე: ჰამასს რამდენიმე ლიდერი ჰყავს, თუმცა ჰანიე უმაღლეს ლიდერად მიიჩნევა.

ის მოძრაობას სათავეში 1980-იან წლებში ჩაუდგა.

  • ისრაელმა ჰანიე 1989 წელს 3 წლით დააპატიმრა, 1992 წელს კი ის ლიბანში გადაასახლეს, ჰამასის რამდენიმე ლიდერთან ერთად.
  • მომდევნო წელს ჰანიე ღაზაში დაბრუნდა. 1997 წელს დაინიშნა ჰამასის სულიერი ლიდერის ოფისის ხელმძღვანელად, ამან მისი პოზიციები კიდევ უფრო განამტკიცა.

///

  • 2006 წელს ჰანიე პალესტინის პრეზიდენტმა მაჰმუდ აბასმა პრემიერ-მინისტრად დანიშნა, მას შემდეგ, რაც ჰამასმა საპარლამენტო არჩევნებში მანდატების უმეტესობა მოიპოვა.
  • თუმცა, მოგვიანებით, აბასის პარტია ფათაჰი ჰამასმა ღაზის სექტორიდან გააძევა, ჰანიე თანამდებობიდან მოხსნეს. მან ამ ფაქტს არაკონსტიტუციური უწოდა და აღნიშნა, რომ მისი მთავრობა "არ მიატოვებდა პალესტინელი ხალხის წინაშე აღებულ ვალდებულებებს" და გააგრძელა ღაზის მართვა.
  • ჰამასის პოლიტიკური ბიუროს ხელმძღვანელად ის 2017 წელს დაინიშნა.
  • 2018 წელს აშშ-ის სახელმწიფო დეპარტამენტმა ჰანიე ტერორისტად აღიარა.
  • ის უკვე რამდენიმე წელია, კატარში ცხოვრობს.

მსგავსი თემა: ვინ არის ჰამასის ლიდერი, რომელიც ყველაზე სასტიკი თავდასხმების უკან დგას