მოკლედ: საქართველოს მესამე პრეზიდენტი, მიხეილ სააკაშვილი პარტია ერთიან ნაციონალურ მოძრაობასა და ასევე, არაპარტიულ თანამებრძოლებსაც სთავაზობს, შეიქმნას პოლიტიკური აქტიურობის და ერთიანობის კომიტეტი.

რას ნიშნავს ეს: "ეს ორგანო უნდა იყოს ამერიკული PAC ან SUPERPAC კომიტეტის ანალოგი" — წერია მიხეილ სააკაშვილის სახელით გამოქვეყნებულ ფეისბუკის პოსტში.

ვის მოიაზრებს სააკაშვილი კომიტეტის წევრებად: საკუთარ თავს, ასევე, ერთიანი ნაციონალური მოძრაობის თავმჯდომარეს, პოლიტსაბჭოსა და საპარლამენტო ფრაქციის თავმჯდომარეს, დიასპორის ერთ წარმომადგენელს აშშ-დან და ორს — ევროპიდან, ენმ-ის ახალგაზრდულ და ქალთა ორგანიზაციის წარმომადგენლებს.

  • "და რაც მთავარია, ქართული საზოგადოების გამორჩეული პირები, რომლებიც მაღალი ავტორიტეტითა და ცნობადობით სარგებლობენ მოსახლეობაში.
    ეს იქნება პატარა (არაუმეტეს 20-25 წევრისა), მოქნილი და ბიუროკრატიულობისგან თავისუფალი პოლიტიკური სათათბირო, რომელიც ეროვნული თანხმობით და კონსენსუსით უხელმძღვანელებს ჩვენს საქმიანობას გარდაუვალი გამარჯვების გზაზე", — აცხადებს ის.

რა არის მიზანი: მიხეილ სააკაშვილის ინიციატივის თანახმად,

  • კომიტეტის გადაწყვეტილებები მიღებული იქნება გამჭვირვალე გარემოში, დემოკრატიული საჯარო დისკუსიის საფუძველზე.
  • "ეს გადაწყვეტილებები ჩამოაყალიბებენ კონკრეტულ პროგრამებს, რომლითაც ენმ-ის არსებული სამდივნო იხელმძღვანელებს თავის პრაქტიკულ საქმიანობაში."

სააკაშვილი: "ეს კომიტეტი მოიაზრება როგორც ჩქარი რეაგირების და იდეების გენერალური ინსტრუმენტი. გარდა ამისა, ეს იქნება ორგანო, რომელიც ხელს შეუწყობს სხვადასხვა, თუნდაც მწვავედ დაპირისპირებული იდეების შეჯიბრებითობის პრინციპის გაღვივებას".

ბოლო ხაზი: მესამე პრეზიდენტი აცხადებს, რომ ამგვარი ჯგუფები ბევრ ქვეყანაში არსებობს, არ საჭიროებს რაიმე სპეციალურ გადაწყვეტილებას ყრილობას, ან პლენუმს, ან რაიმე სპეციალურ თავშეყრას და არ არის მუდმივი ორგანო. "ანუ ემსახურება სპეციფიკური კონკრეტული ამოცანების გადაჭრას, ამ შემთხვევაში არჩევნებში გამარჯვებას."