რა ხდება: საქართველოს პრემიერ-მინისტრი ირაკლი ღარიბაშვილი ევროკომისიის პრეზიდენტს, ურსულა ფონ დერ ლაიენს და ევროპული საბჭოს პრეზიდენტს − შარლ მიშელს წერილებს უგზავნის.

  • ინფორმაცია მთავრობის ადმინისტრაციამ გაავრცელა.

დეტალები: წერილებში ღარიბაშვილი მადლობას უხდის ფონ დერ ლეიენსა და მიშელს საქართველოს მხარდაჭერისთვის ევროსტრუქტურებში ინტეგრაციის კუთხით.

  • პრემიერ-მინისტრი წერს, რომ ევროპის მხარდაჭერის შედეგად, "მისმა მთავრობამ გააგრძელა ქართველი ხალხის მოლოდინის ასრულება".
  • ღარიბაშვილ დარწმუნებულია, რომ ევროკავშირი გააგრძელებს საქართველოს გვერდით დგომას "კანდიდატის სტატუსის მინიჭების შესახებ, კიდევ ერთი ისტორიული გადაწყვეტილებით".

"მძიმედ დაპირისპირებულ რეგიონში ვაგრძელებთ საქართველოს როლის განმტკიცებას, როგორც რეგიონული მშვიდობისა და სტაბილურობის, დემოკრატიული განვითარებისა და თანამშრომლობის საყრდენს; ჩვენ ასევე ვართ გადამწყვეტი რგოლი გლობალური დაკავშირებადობის რუკაზე, რომელიც მსოფლიოს სთავაზობს ალტერნატიულ მარშრუტებს ენერგეტიკის სფეროში თანამშრომლობისთვის და შავ ზღვაზე ტვირთბრუნვისა და ვაჭრობის განვითარებისთვის. დარწმუნებული ვართ, რომ საქართველო, როგორც ევროკავშირის მომავალი წევრი სახელმწიფო, მნიშვნელოვან როლს შეასრულებს ევროპის საერთო კეთილდღეობაში,"— წერს პრემიერ-მინისტრი.

  • ის, ასევე, ორივე წერილში აღნიშნავს, რომ საქართველოს მთავრობა მზად არის, გააგრძელოს ევროკავშირში გაწევრიანებისთვის საჭირო ვალდებულებების შესრულება.

ბოლო ხაზი: სულ რამდენიმე დღეში ცნობილი უნდა გახდეს ევროკავშირის გადაწყვეტილება, მიანიჭებენ თუ არა საქართველოს ევროკავშირის კანდიდატის სტატუსს.

  • გადაწყვეტილების გამოცხადების თარიღი დაზუსტებული არ არის, თუმცა, სავარაუდო დრო 14-15 დეკემბერია.