საქართველოს პრემიერ-მინისტრი, გიორგი კვირიკაშვილი ამბობს, რომ რუსეთი ყოველდღიურად აგრძელებს საქართველოს ოკუპაციისა და ფაქტობრივი ანექსიის პოლიტიკას. ამის შესახებ კვირიკაშვილმა საერთაშორისო კონფერენციაზე - საქართველოს ევროპული გზა - დღეს, 13 ივლისს განაცხადა.

პრემიერ-მინისტრის თქმით, საოკუპაციო ხაზის გამაგრება მავთულხლართებით, ხელოვნური ბარიერებითა თუ ე.წ. საზღვრის აღმნიშვნელი ნიშნებით პერმანენტული ხასიათის გახდა. კვირიკაშვილმა დასძინა, რომ მაქსიმალურად შეზღუდულია თავისუფალი გადაადგილება საოკუპაციო ხაზზე, იხურება ე.წ. გადასასვლელი პუნქტები, კვლავაც გრძელდება ე.წ. საზღვრის უკანონო გადაკვეთის საბაბით ადამიანების დაკავებისა და გატაცების შემთხვევები.

"ამ ფონზე, ცხადია, კიდევ უფრო მეტ მნიშვნელობას იძენს საერთაშორისო თანამეგობრობის ძალისხმევის კონსოლიდირება, რათა რუსეთმა მკაფიო გზავნილი მიიღოს ნაკისრი ვალდებულებების შესრულებისა და კონფლიქტის საერთაშორისო სამართლის პრინციპების შესაბამისად, მშვიდობიანი გზით მოწესრიგების აუცილებლობასთან დაკავშირებით," - განაცხადა პრემიერ-მინისტრმა.

მან მადლობა გადაუხადა ევროკავშირის სადამკვირვებლო მისიას საქართველოში, როგორც ერთადერთ საერთაშორისო მექანიზმს. პრემიერის თქმით, ამ სადამკვირვებლო მისიას 2008 წლის აგვისტოს ომის შემდეგ ადგილზე უსაფრთხოებასა და სტაბილურობაში, ნდობის აღდგენასა და ვითარების ესკალაციის პრევენციაში დიდი წვლილი შეაქვს.

რამდენიმე დღის წინ საქართველოს საოკუპაციო ხაზთან ე.წ. საზღვრის აღმნიშვნელი ბანერი კიდევ გაჩნდა. სახელმწიფო უსაფრთხოების სამსახურის განცხადებით, ინფორმაცია, თითქოს რუსმა სამხედროებმა სოფელ ბერშუეთში საოკუპაციო ხაზი გადმოწიეს სიმართლეს არ შეესაბამება.