რა ხდება: ოკუპირებული აფხაზეთის ე.წ. პრეზიდენტმა ასლან ბჟანიამ ე.წ. პარლამენტთან შეხვედრისას აქტუალური საკითხები განიხილა.

დეტალები: მათ შორის, ბჟანიამ ისაუბრა თავდაცვის ძალების საჭიროებაზეც. მისი თქმით, მშვიდად ცხოვრებისთვის აუცილებელია "თანამედროვე არმია რაკეტებითა და დრონებით, საჭირო აღჭურვილობით, ტექნიკით, ტანკებით, თვითმფრინავებითა და ვერტმფრენებით".

  • ე.წ. პრეზიდენტის თქმით, აფხაზეთი დღევანდელი გლობალური დაპირისპირების ერთ-ერთი მტკივნეული წერტილია და დასავლეთს, რომელსაც წარმოადგენს შეერთებული შტატები და ევროპული ქვეყნები, არ სურს აფხაზეთის დანახვა მსოფლიოს ნაწილად.
  • "მათ უნდათ, რომ ჩვენი დედაქალაქი იყოს არა სოხუმში, არამედ თბილისში და მიზანმიმართულად მუშაობენ, რომ ეს მოხდეს. ეს მათ სჭირდებათ იმისთვის, რომ მსოფლიოს დაანახონ რუსეთის ფედერაციის მიერ ჩვენი სუვერენიტეტის აღიარების მნიშვნელობის არქონა, ასევე, დაანახონ საქართველოს და რეგიონის სხვა ქვეყნებს, რომ პრობლემების გადაჭრის გასაღები მათ ჯიბეშია. ყველაფერს აკეთებენ, რომ აფხაზეთი არ განვითარდეს“, — აღნიშნა მან.

ბჟანიას თქმით, აფხაზეთი უნდა ისწრაფოდეს, გახდეს მსოფლიოს განსხვავებული არქიტექტურის, უსაფრთხოების ახალი სისტემის ნაწილი, რომელიც აგებულია ურთიერთპატივისცემაზე, სუვერენიტეტის აღიარებას და მოკავშირეებთან ინტეგრაციაზე.

  • "აი, რატომ ვართ რუსეთთან ერთად! ამ მიზეზით, ჩვენ ორიენტირებული ვართ მასთან ასეთი ურთიერთობის დამყარებაზე. აფხაზეთი, რუსეთთან ერთად, გლობალური კრიზისის ნაწილი აღმოჩნდა. მთელი ევროპა ჩაერთო ამ კონფლიქტში. ადამიანური ძალის რეზერვები, ქონებრივი რეზერვები და ევროპის ქვეყნების სიმდიდრე უკვე გაიფლანგა, სპეციალური სამხედრო ოპერაცია კი უკრაინაში გადამწყვეტ ფაზაში შევიდა. ვფიქრობ, არ არის საჭირო იმის ახსნა, რომ იქ მომხდარი სისხლიანი ტრაგედიის შედეგი შორს არ არის“, — თქვა ბჟანიამ.

მსგავსი თემა: აფხაზეთი USAID-ს და სამშვიდობო პროექტებს კრძალავს