შიმშილობის ერთი დღე — რას აპროტესტებენ მასწავლებლები

მოკლედ: ქართული ენისა და ლიტერატურის მასწავლებელი, მაია ეკალაძე 24 საათზე მეტია, განათლების სამინისტროსთან შიმშილობს.

ის ფიქრობს, რომ დირექტორთა შესარჩევი კონკურსი უსამართლოდ ჩატარდა.
მის პროტესტს იზიარებს და მასთან ერთად, სამინისტროსთან იმყოფება კიდევ ერთი მასწავლებელი, დავით ფერაძე.

დეტალები: პროტესტის მონაწილე მასწავლებლები მიიჩნევენ, რომ დირექტორთა შესარჩევი კონკურსიდან უსამართლოდ დაბლოკეს.

"დაბლოკვის" მიზეზად სხვადასხვა ფაქტორს ასახელებენ.
მაია ეკალაძის აზრით, ერთ-ერთი მიზეზი, შესაძლოა, პოლიტიკური დამოკიდებულებები იყოს, მათ შორის ისიც, რომ მარტში, რუსული კანონის საწინააღმდეგო აქციებში მონაწილეობდა.
ის იმასაც აღნიშნავს, რომ ეს შესარჩევი კონკურსების არასამართლიანად ჩატარების პირველი შემთხვევა არ არის და უკვე მრავალი წელია, ასე ხდება.
"ეს მანკიერი სისტემა — ნაცნობობის, მეგობრობის, პარტიის წევრობის, კონკურსებზე არ დამთავრდა. თუ კონკურსი ჰქვია, უნდა იყოს სანდო, გამჭვირვალე, ღია და ობიექტური", — გვეუბნება მაია.

მინისტრთან შეხვედრა, მოთხოვნები და პასუხები: 4 დეკემბერს, მაია ეკალაძე და დავით ფერაძე განათლების მინისტრს, გიორგი ამილახვარს შეხვდნენ. მათი მოთხოვნები იყო:

დირექტორების დანიშვნა დისკრეციული წესით იმ სკოლებში, რომლებსაც ამ დრომდე, დირექტორობის მოვალეობის შემსრულებლები ხელმძღვანელობენ;
მასწავლებლებისთვის ხელფასების ზრდა იანვრიდან, როგორც ეს თავიდან იყო გაცხადებული და არა ივნისიდან.
შეხვედრის შემდეგ ეკალაძემ და ფერაძემ ხელფასების იანვრიდან მომატების მოთხოვნაზე უარი თქვეს, რადგან, მინისტრის თქმით, სხვა მასწავლებებისთვის მისაღებია ხელფასის ივნისიდან ზრდა.
დანარჩენი მოთხოვნები კი ძალაში დარჩა: ისინი ითხოვენ, სამინისტრომ აღიაროს შეცდომა და თქვას, რომ კონკურსი უსამართლოდ ჩატარდა.

ამ დროისთვის,

მთლიანობაში, პროტესტის მონაწილე მასწავლებლები ამილახვართან შეხვედრით უკმაყოფილონი არიან.
მაია ეკალაძის თქმით, ეს იყო მხოლოდ შეხვედრა შეხვედრისთვის.
"ჩვენ ხელის ჩამოსართმევად არ შევსულვართ იქ. შემხვდეს, კამერების წინ, დამისვას ნებისმიერი კითხვა და მერე საზოგადოებამ განსაჯოს", — ამბობს ის.
დავით ფერაძის აზრით კი, სამინისტროსთვის ადამიანი არ არის ღირებული;
"ფაქტია, ამდენი დრო გავიდა, მთელი ღამე აქ ვიყავით და არ შეაწუხა სინდისმა, რომ ვიღაც მაინც გამოეგზავნა, წარმომადგენელი და ეთქვა, რომ მოდით, მეგობრებო, სიცოცხლეს საფრთხეს ნუ შევუქმნით", — აღნიშნავს ფერაძე.