რა ხდება: ჰამასსა და ისრაელს შორის ზავი, რომელიც დღეს უნდა ამოწურულიყო, კიდევ ერთი დღით გაგრძელდა.

  • კატარმა დაადასტურა, რომ ცეცხლის შეწყვეტის შესახებ შეთანხმება პარასკევამდე იმოქმედებს.
  • "პალესტინელები და ისრაელის მხარე შეთანხმდნენ, რომ ღაზაში ჰუმანიტარული ზავი კიდევ ერთი დღე გაგრძელდეს", — თქვა კატარის საგარეო საქმეთა სამინისტროს წარმომადგენელმა, მაჯედ ალ-ანსარიმ.
  • მისი განმარტებით, ზავი იმავე პირობებით გაგრძელდება — საომარი მოქმედებები შეჩერდება, ისრაელელი ტყვეების გათავისუფლების სანაცვლოდ კი ისრაელი პალესტინელ პატიმრებს გამოუშვებს, ყოველ ერთ ტყვეზე სამი პატიმარი გაიცვლება.
  • ალ-ანსარიმ აღნიშნა, რომ ზავი კატარის, ეგვიპტისა და აშშ-ის მედიაციის ჩარჩოში გრძელდება.

ზავის შედეგები: შეთანხმების ფარგლებში, რომელიც პარასკევს დაიწყო, უკვე გათავისუფლდა 70 ისრაელელი ტყვე და 210 პალესტინელი პატიმარი.

  • ჰამასმა შეთანხმების მიღმა გაათავისუფლა 30 უცხო ქვეყნის, ან — ორმაგი მოქალაქეობის მქონე პირები, უმეტესად, ისრაელში მომუშავე ტაილანდელები.
  • ასევე, ზავმა ასობით სატვირთო მანქანას მისცა საშუალება, ღაზაში ჰუმანიტარული ტვირთი შეეტანათ.
  • საბრძოლო მოქმედებები, ზავის დასრულებისთანავე გაგრძელდება.

ბოლო ხაზი: ისრაელისა და ჰამასის ომი მას შემდეგ დაიწყო, რაც პალესტინური სამხედრო დაჯგუფება თავს დაესხა სამხრეთ ისრაელში მშვიდობიან მოქალაქეებს, ტყვედ აიყვანა 240-ზე მეტი ადამიანი, 1200 კი — მოკლა.

  • ომს ღაზაში ქალაქებისა და დასახლებული პუნქტების უდიდესი ნაწილის განადგურება მოჰყვა, დაიღუპა 12 000-ზე მეტი პალესტინელი.