გუდაუთის რაიონში რუს ტურისტებს თავს დაესხნენ. შემთხვევა მსხვერპლით დასრულდა.

ორი ოჯახი მოსკოვიდან, ცოლ-ქმარი ანატოლი და ნატალია კაბანოვები, ასევე ნატალია და ნიკოლაი ჩეჟიკოვები, სამ შვილთან ერთად, გუდაუთაში ისვენებდნენ. მათთან ორი შავნიღბიანი უცნობი მივიდა, ერთერთი მათგანი ავტომატით, მეორე კი დანით იყო შეიარაღებული. მათ ტურისტებს ფული მოსთხოვეს. ამის შესახებ ინფორმაცია ჯემნიუსს აფხაზეთის ე.წ. სამართალდამცავი ორგანოებიდან ერთ-ერთმა წყარომ მიაწოდა.

“ერთ-ერთი უფროსი ფულის მოტანის მიზნით გავიდა სახლიდან და მილიციის გამოსაძახებლად წავიდა. ამავე დროს მეორე მამაკაცმა, რომელიც მძევლად დაიტოვეს, თავდამსხმელებისთვის წინააღმდეგობის გაწევა სცადა, მაგრამ ის მოკლეს”, – ამბობს ჯემნიუსის წყარო.

მისი თქმით, მამაკაცმა, რომელიც ფულის მოსატანად წავიდა, შემთხვევის ადგილზე დაბრუნების შემდეგ ასევე სცადა წინააღმდეგობის გაწევა. ამ დროს ის დანით დაჭრეს და უკვე საავადმყოფოშია გადაყვანილი.

როგორც ჯემნიუსის კორესპონდენტს აფხაზეთის დე-ფაქტო შინაგან საქმეთა სამინისტროში განუცხადეს, მთელი რაიონი გადაკეტილია ზღვიდან გზატკეცილამდე და ძებნის ღონისძიებები მიმდინარეობს.

ადგილობრივი ე.წ. სამართალდამცავი ორგანოების ცნობით, სავარაუდო დამნაშავეებმა მძევლები გაათავისუფლეს. მიმდინარეობს ინციდენტის დეტალების გამოკვლევა, მათ შორის, სამართალდამცავები შემთხვევის ადგილს სწავლობენ.