რა ხდება: საქართველოს პროკურატურამ ჯანმრთელობის განზრახ მძიმე დაზიანების, ცეცხლსასროლი იარაღისა და საბრძოლო მასალის მართლსაწინააღმდეგო შეძენა, შენახვისა და ტარების ფაქტებზე გურამ ელიზბარაშვილს ბრალი წარუდგინა.

  • უწყების ინფორმაციით, ელიზბარაშვილმა ყაზახეთის მოქალაქეს, თანნაქონი იარაღით, ორივე ფეხის არეში, მრავლობითი ჭრილობა მიაყენა.
  • ერთ-ერთი გასროლისას, მან გაუფრთხილებლობით, თავადაც მიიყენა ჭრილობა მუხლის არეში.
  • "მას შემდეგ, რაც ყაზახეთის მოქალაქემ, ს.მ.-მ შვილი საბავშვო ბაღში დატოვა, მასსა და ბრალდებულ გ.ე.-ს შორის კონფლიქტი მოხდა. კერძოდ, ყაზახეთის მოქალაქემ ბრალდებულს ძაღლის ბაგა-ბაღის ტერიტორიაზე სეირნობასთან დაკავშირებით შენიშვნა მისცა, რაც კონფლიქტში გადაიზარდა, — აღნიშნულია პროკურატურის განცხადებაში.

დეტალები: უწყებაში ამბობენ, რომ შემთხვევა 14 ნოემბერს, ჟვანიას ქუჩის მიმდებარე ტერიტორიაზე, დაახლოებით, 08:50 საათზე მოხდა.

  • მათი მტკიცებით, სამართალდამცავებმა ელიზბარაშვილი შემთხვევიდან რამდენიმე საათში დააკავეს.
  • როგორც პროკურატურაში აცხადებენ, ელიზბარაშვილი წარსულში განზრახ მკვლელობისთვის იყო ნასამართლევი.