პატრიოტთა ალიანსის წევრები ადა მარშანია, გიორგი ლომია და ნატო ჩხეიძე 11 ივლისს რუსეთის ფედერაციის სათათბიროს დეპუტატებს შეხვდებიან. შეხვედრის შესახებ საზოგადოებრივი მაუწყებელი ავრცელებს.

მაუწყებელთან საუბრისას პატრიოტთა ალიანსის ლიდერმა, ირმა ინაშვილმა განაცხადა, რომ პირველი შეხვედრის მიზანი "რეალური დიალოგის" დაწყებაა.

"ყველა ადამიანი, ვინც ამბობს, რომ აუცილებელია რაღაც აქციები, საოკუპაციო ზოლთან მისვლა, გვახსოვს რა პიარ აქციები იგეგმებოდა სააკაშვილის დროს, სწორედ ეს ადამიანები ეწინააღმდეგებიან ჩვენი ქვეყნის გამთლიანებას და არა ჩვენი ინიციატივა, რომელიც არის პოლიტიკური ინიციატივა, რათა რეალურად გადაწყდეს პრობლემები," - აცხადებს ინაშვილი საზოგადოებრივ მაუწყებელთან საუბრისას.

მისივე თქმით, მათ არ აქვთ მოლოდინი რომ საქართველო "ხვალვე" გაერთიანდება, თუმცა მიაჩნიათ, რომ საუბრის დაწყებას ალტერნატივა არ აქვს.