უკრაინის პრეზიდენტის, ვოლოდიმირ ზელენსკის თქმით, უკრაინაში საპრეზიდენტო არჩევნებზე საუბარი უპასუხისმგებლობა იქნებოდა.

  • ზელენსკი მიიჩნევს, რომ ომის პირობებში, არჩევნების გამართვა მიზანშეწონილი არ არის.
  • "ახლა არის თავდაცვის, ბრძოლის დრო, რომელზეც დამოკიდებულია ჩვენი ქვეყნისა და ხალხის ბედი," — თქვა ზელენსკიმ ყოველდღიურ ვიდეომიმართვაში და დაამატა, რომ მხარეებად დაყოფის დრო ახლა არ არის.

პარასკევს, უკრაინის საგარეო საქმეთა მინისტრმა დმიტრო კულებამ განაცხადა, რომ პრეზიდენტი განიხილავდა არჩევნების ჩატარების მიზანშეწონილობას.

არჩევნებთან დაკავშირებული დილემა: 2022 წლის თებერვალში, უკრაინაში რუსეთი რომ არ შეჭრილიყო, საპარლამენტო არჩევნები წელს, ოქტომბერში გაიმართებოდა, 2024 წლის მარტში კი მოსახლეობა ქვეყნის პრეზიდენტს აირჩევდა.

  • კიევი, ახლა, დილემის წინაშე აღმოჩნდა. დასავლელი პარტნიორები, მათ შორის — აშშ, მოუწოდებენ უკრაინას, ჩაატაროს არჩევნები.
  • თუმცა, ომში მყოფ ქვეყანას ამისთვის არაერთი დაბრკოლება აქვს — უკრაინის ტერიტორიის თითქმის 20% რუსეთს აქვს ოკუპირებული, ფრონტის ხაზზე მყოფი ჯარისკაცებისთვის ხმის მიცემა რთული იქნება და ასევე, არჩევნებმა, შესაძლოა, უსაფრთხოებას შეუქმნას რისკი.
  • "ახლა კონფლიქტების დრო არ არის. ყველას გვესმის, რომ ომის დროს, როდესაც უამრავი გამოწვევაა, სრულიად უპასუხისმგებლო იქნება, საზოგადოებას არჩევნებზე ვესაუბროთ," — თქვა ზელენსკიმ.