ქართული ოცნების წევრი და დეპუტატი, ლევან გოგიჩაიშვილი, ტელეკომპანია იმედთან საუბრისას აცხადებს, რომ ნარკომომხმარებელი ციხეში არ უნდა წავიდეს, თუმცა ის საქართველოს ნარკოპოლიტიკის ეროვნული პლატფორმის მიერ პარლამენტში შეტანილ კანონპროექტის ნაწილს აკრიტიკებს.

"ისინი ითხოვენ ისეთ რამეს, რისი დაშვებაც ჩვენს ქვეყანაში არ შეიძლება. გამორიცხულია, იმიტომ რომ ვერ გავაკონტროლებთ პროცესს, ვაზს აჩეხავენ გლეხები, ხეებს აჩეხავენ და დარგავენ მარიხუანას. ეს თუ გვინდა ჩვენ, ესეთი ქვეყანა, მე ამას არ დავუშვებ" - აცხადებს გოგიჩაიშვილი.

საქართველოს პარლამენტში ინიცირებულია კანონპროექტი, რომელიც ნარკოტიკების მოხმარების და მცირე ოდენობით ფლობის, ასევე მარიხუანის დათესვის, მოყვანის და კულტივირების დეკრიმინალიზაციას ითვალისწინებს. კანონპროექტის ინიციატორები არიან პარლამენტის წევრები: აკაკი ზოიძე, ლევან კობერიძე, დიმიტრი ცქიტიშვილი, ირინა ფრუიძე და სოფო ქაცარავა. კანონპროექტის ავტორია საქართველოს ნარკოპოლიტიკის ეროვნული პლატფორმა. კანონპროექტის შემუშავებაში ჯანდაცვის კომიტეტიც მონაწილეობდა.