საქართველოს პრემიერმინისტრის, გიორგი კვირიკაშვილის, განცხადებით, ქართული ოცნება საქართველოს გაერთიანებას მხოლოდ მშვიდობით და მოლაპარაკებების გზით აპირებს. ამის შესახებ მან დღეს განაცხადა.

პრემიერის თქმით, ქართულმა ოცნებამ, ოკუპაციის სახით, მძიმე მემკვიდრეობა მიიღო:

"135 სოფელი, როგორც ამას ცდილობს წარმოაჩინოს ოპოზიციის ნაწილი, დაკარგული გახლავთ არა მცოცავი ოკუპაციის შედეგად, არამედ ოკუპაციის შედეგად. და ოკუპაცია გახლავთ ის მძიმე მემკვიდრეობა, რომელიც ჩვენმა პოლიტიკურმა ძალამ მიიღო, როდესაც ჩვენ მოვედით ხელისუფლებაში. ჩვენ ყველაფერს გავაკეთებთ იმისათვის, რომ ამ მძიმე მემკვიდრეობისაგან გავათავისუფლოთ ჩვენი მომავალი თაობა".

პრემიერი აცხადებს, რომ ამერიკაში, ვიცე-პრეზიდენტ მაიკ პენსთან შეხვედრისას მან განაცხადა, რომ ტერიტორიული მთლიანობის საკითხი საქართველოს მოსახლეობას ყველაზე მეტად აწუხებს:

"მე იქ ხაზგასმით აღვნიშნე - ბატონო ვიცე-პრეზიდენტო, არ დაიჯეროთ არც ერთი კვლევის, რომელიც აჩვენებს, რომ ოკუპაცია და ტერიტორიული მთლიანობის საკითხი არის მეორე, მესამე ან უფრო ქვედა რიგის საკითხი. ყოველთვის, რაც არ უნდა მოხდეს საქართველოში, რანაირი წარმატებაც არ უნდა იყოს, ეს დარჩება ნომერ პირველ საკითხად ჩვენი მოსახლეობის ცნობიერებაში".

კვირიკაშვილი ამბობს, რომ მისთვის დღითიდღე უფრო ძნელი ხდება, ოპოზიციისგან ოკუპაციასთან დაკავშირებული ბრალდებების მოსმენა და დასძენს, რომ "ეს საკითხი ქართული ოცნების დღის წესრიგში ყოველთვის ნომერ პირველი იყო".