ჩეხეთი-საქართველოს საფეხბურთო მატჩი ტრიბუნიდან ნივთების სროლის გამო რამდენიმე წუთით შეჩერდა. მატჩის შეჩერების გადაწყვეტილება მსაჯმა მიიღო. როგორც საზოგადოებრივი მაუწყებლის კომენტატორები ამბობდნენ, სავარაუდოდ, ბოთლი მასაც მოხვდა.

გულშემატკივრებმა ტრიბუნებიდან ნივთების სროლა მას შემდეგ დაიწყეს, რაც ჩეხეთის ნაკრებმა საქართველოს ნაკრებს მეორე გოლი გაუტანა. გოლის გატანას ნივთების სროლა მოჰყვა და მატჩი დაახლოებით ხუთი წუთის განმავლობაში შეჩერებული იყო.

ევროპის 19 წლამდე საფეხბურთო ნაკრებთა ჩემპიონატის "ა" ჯგუფის ბოლო ტურის მატჩები 8 ივლისს იმართება. დღეს, საქართველოს ნაკრები "ა" ჯგუფის მესამე შეხვედრას ჩეხეთის წინააღმდეგ ატარებს. დღევანდელი შეხვედრით გაირკვევა ნახევარფინალისტის ვინაობა. ორი მატჩის შემდეგ ორივე ნაკრებს თანაბარი, სამ-სამი ქულა აქვთ.