მოკლედ: დღეს, ნაციონალური მოძრაობის სამოქალაქო ინტეგრაციის მდივანმა, ედო ჯავახიძემ და სტრატეგია აღმაშენებლის ეთნიკურ-რელიგიური უმცირესობების მიმართულების ხელმძღვანელმა, შორენა ლობჟანიძემ ერთობლივი ბრიფინგი გამართეს.

  • "ბოლო 30 წლის განმავლობაში, ქვეყნის მოსახლეობა 2 მილიონით შემცირდა, ქვეყნის ტერიტორიის 20% ოკუპირებულია, ყოველწლიურად 100 000-მდე თანამოქალაქე ტოვებს საქართველოს, ქვეყანაში რუსი მოსახლეობის შემოდინება უკონტროლოა", — აღნიშნეს მათ ბრიფინგისას.
  • პარტიაში აცხადებენ, რომ საქართველოში 300 000-ზე მეტი ადამიანი ვერ საუბრობს ქართულად.
  • მათი თქმით, ამ ყველაფრის ფონზე, ქვეყნის მთავარი ამოცანა მისი თითოეული მოქალაქის პოტენციალის გამოყენება უნდა იყოს.

დეტალები: ედო ჯავახიძის განმარტებით, ენმ-სა და სტრატეგია აღმაშენებლის მიერ შემუშავებული ერთობლივი პროგრამა გულისხმობს:

  • ქართული ენის მასწავლებელთა რაოდენობის გაორმაგებას;
  • ქართული ენის უფასოდ სწავლებას 1+4 პროგრამის ფარგლებში;
  • არაქართულენოვან მოსახლეობაში ქართული ენის მასწავლებლებისთვის ანაზღაურების გაზრდას;
  • თანამედროვე საჭიროებებზე მორგებული, ორენოვანი სწავლების კონცეფციის შემუშავებას;
  • არაქართულენოვან დასახლებებში ბაღების მშენებლობას;
  • პედაგოგების გადამზადების ეფექტიანი მექანიზმის დანერგვას.