მოზარდებისა და ახალგაზრდების თითქმის ნახევარი მიიჩნევს, რომ თანამედროვე ფილმებსა და სერიალებში სასიყვარულო ისტორიებს "გადაჭარბებულად" იყენებენ. ეს ერთ-ერთი დასკვნაა კვლევისა, რომელიც აგვისტოს თვეში კალიფორნიის უნივერსიტეტმა ჩაატარა. კვლევაში მონაწილეობა 10 წლიდან 24 წლამდე ასაკის 1 500-მა მოზარდმა და ახალგაზრდამ მიიღო. მათი უმეტესობა ისურვებდა, რომ ფილმებსა და სერიალებში ნაკლები სექსი და მეტი მეგობრობა ენახა (12 წლამდე ასაკის მოზარდებისთვის სასიყვარულო ურთიერთობებსა და სექსზე შეკითხვები არ დაუსვამთ).

"კვლევამ აჩვენა, რომ მოზარდები დაიღალნენ სტერეოტიპული, ჰეტერონორმატიული ამბებით, რომლებიც რომანტიკულ და სექსუალურ ურთიერთობებს ასახავენ, განსაკუთრებით კი — ტოქსიკურ ურთიერთობებს", — ამბობენ მკვლევრები, — "ისინი [ფილმებსა და სერიალებში] უფრო მეტად ეძებენ მეგობრობის ამსახველ ისტორიებს, ეს კი მოზარდობისა და სოციალური კეთილდღეობის ცენტრალური ნაწილია".

უფრო ზუსტად, კვლევის მიხედვით, ახალგაზრდების 51,5 პროცენტი ისურვებდა, ფილმებსა და სერიალებში "უფრო მეტი მეგობრობა და პლატონური ურთიერთობა" ეხილა.

ამასთან, რესპონდენტების თქმით, არ აინტერესებთ პერსონაჟების შეუფერებელი წყვილები, რომლებიც გამუდმებით ჩხუბობენ და შორდებიან ერთმანეთს.

"ათ ყველაზე საძულველ სტერეოტიპს შორის მეოთხე ადგილს იკავებს ის ფორმა, თუ როგორ არის წარმოჩენილი სასიყვარულო ურთიერთობები — ხშირად არაბუნებრივად, თავსმოხვეულად და ტოქსიკურად", — ამბობს კვლევა.

კვლევის მონაწილეებს ფილმებსა და სერიალებში ასევე აღიზიანებთ ის, რომ "ურთიერთობები აუცილებლად ბედნიერი უნდა იყოს, მთავარი გმირი კაცი და მთავარი გმირი ქალი რომანტიკულ ურთიერთობაში უნდა აღმოჩნდნენ, სასიყვარულო სამკუთხედი უნდა შეიკრას და სხვა".

რიცხვები კი ასეთია: 44,3 პროცენტი ამბობს, რომ ფილმებსა და სერიალებში რომანტიკა ჭარბი დოზითაა, 47,5 პროცენტის თქმით კი, "სიუჟეტებში სექსი ზედმეტია".

რესპონდენტები ასევე ისურვებდნენ, ფილმებსა და სერიალებში ნაკლებად იხილონ რასობრივი სტერეოტიპები და არარეალისტური სტანდარტები — რომ, მაგალითად, მუყაითი შრომა ყოველთვის წარმატების მომტანია.

ამასთან, ახალგაზრდების 56 პროცენტი ამბობს, რომ "ფრენჩაიზებს, ადაპტაციებსა და ახლებურ ვერსიებს" ორიგინალური ნამუშევრები ურჩევნია.

"კვლევამ აჩვენა, რომ მოზარდებსა და ახალგაზრდებს უფრო მეტი და განსხვავებული ურთიერთობის ხილვა სურთ ეკრანზე", — აჯამებს კვლევის თანაავტორი იალდა ტ. ულსი, — "ჩვენ ვიცით, რომ ახალგაზრდებში მარტოობის ეპიდემიაა გავრცელებული, ამიტომ ისინი ფილმებსა და სერიალებში ეძებენ [ურთიერთობის] მოდელებს. პერსონაჟების ერთიმეორესთან დასაკავშირებლად ბევრი იყენებს სექსსა და სიყვარულს, მაგრამ ჰოლივუდში უნდა გაიაზრონ, რომ ახალგაზრდებს ურთიერთობების სრული სპექტრის ხილვა სურთ".