რა ხდება? გაეროს ხელმძღვანელის თქმით, 7 ოქტომბრის თავდასხმა ისრაელზე "არ მომხდარა ვაკუუმში". ანტონიო გუტერეში ამბობს, რომ პალესტინელი ხალხი 56-წლიანი მგუდავი ოკუპაციის ქვეშ არის.

რატომ არის მნიშვნელოვანი? 24 ოქტომბერს, გაეროში ისრაელის მუდმივმა წარმომადგენელმა, გილად ერდანმა, გადადგომისკენ მოუწოდა ანტონიო გუტერეშს — გაეროს გენერალურ მდივანს.

გუტერეშის არგუმენტები:

  • "ისინი ხედავენ, როგორ ჩნდება მათ მიწაზე [ებრაული] დასახლებები. ეკონომიკა დანგრეულია, ადამიანები ლტოლვილებად იქცნენ, მათი სახლები დანგრეულია. პალესტინელების იმედები, რომ მათი მდგომარეობის პოლიტიკურად გადაჭრა შესაძლებელია, გაქრა," - თქვა გუტერეშმა.
  • თუმცა, მან, ასევე, აღნიშნა, რომ "ეს არ ამართლებს ჰამასის საზარელ თავდასხმებს და, თავის მხრივ, ეს საზარელი თავდასხმები არ ამართლებს პალესტინელი ხალხის კოლექტიურ დასჯას".
  • მან, უშიშროების საბჭოს სხდომაზე გამოსვლისას აღნიშნა, რომ ღაზის სექტორში ადგილი აქვს საერთაშორისო ჰუმანიტარული სამართლის აშკარა დარღვევას და აუცილებელია, სასწრაფოდ შეწყდეს ცეცხლი, რათა ღაზაში საჭმლის, წყლის, მედიკამენტებისა და საწვავის შეტანა მოხერხდეს.
  • ანტონიო გუტერეში ხედავს რისკს, რომ ღაზის ომი რეგიონშიც გავრცელდეს, რადგან საზოგადოებებში დაძაბულობა მატულობს.
  • მან ხაზი გაუსვა, რომ მშვიდობიანი მოსახლეობის დაცვა არ გულისხმობს მათ ფარად გამოყენებას, ამ კონტექსტში მან ჰამასი იგულისხმა.
  • ასევე, გააკრიტიკა ისრაელი და აღნიშნა, რომ "ადამიანების დაცვა არც იმას ნიშნავს, მოუწოდო მილიონზე მეტ ადამიანს ღაზის სამხრეთით ევაკუაციისკენ, სადაც არც თავშესაფარია, არც საკვები, არც წყალი, არც მედიკამენტები, არც საწვავი და ამასთან, გააგრძელო სამხრეთის ბომბვაც".

როგორია ისრაელის პასუხი: ისრაელის საგარეო საქმეთა მინისტრმა ელი კოენმა გააკრიტიკა გენერალური მდივნის განცხადებები. მან უარი თქვა გუტერეშთან შეხვედრაზე და X-ზე (ყოფილი "ტვიტერი") დაწერა, რომ "ახლა დაბალანსებული მიდგომების დრო არ არის, ჰამასი უნდა განადგურდეს"

  • ისრაელის ელჩმა გაეროში, გილად ერდანმა თქვა, რომ გუტერეშმა "მორალურობა და მიუკერძოებლობა" დაკარგა და მას გადადგომისკენ მოუწოდა.

როგორია აშშ-ის პოზიცია: სახელმწიფო მდივანმა გაეროში გამართულ სხდომაზე თქვა, რომ პალესტინელი მოსახლეობა დაცული უნდა იყოს.

  • ამერიკის პირველმა დიპლომატმა მოუწოდა ჰამასს, შეწყვიტონ ადამიანების ფარად გამოყენება, ასევე, უთხრა ისრაელს, რომ მათ სიფრთხილე უნდა გამოიჩინონ.
  • ბლინკენმა თქვა, რომ ღაზაში აუცილებლად უნდა შევიდეს საჭმელი, წყალი და მედიკამენტები.