დღეს, 3 ოქტომბერს, 12:00 საათზე საკონსტიტუციო სასამართლოში პრეზიდენტის იმპიჩმენტის საკითხის განხილვა დაიწყო.

რატომ არის მნიშვნელოვანი: 30 აგვისტოს ცნობილი გახდა, რომ სალომე ზურაბიშვილი საქართველოსთვის კანდიდატის სტატუსის მინიჭების მხარდასაჭერად ევროპელ ლიდერებთან შეხვედრებს იწყებდა.

• ქართულმა ოცნებამ ზურაბიშვილი ერთხმად გააკრიტიკა — ირაკლი კობახიძე ამბობდა, რომ პრეზიდენტმა უხეშად დაარღვია კონსტიტუცია და "რეაგირების გარეშე ვერ დატოვებდნენ".
• ის აღნიშნავდა, რომ მთავრობის თანხმობის გარეშე ოფიციალური ვიზიტები არაკონსტიტუციურია, ამიტომ მიიღეს გადაწყვეტილება, პრეზიდენტის მიმართ იმპიჩმენტის პროცედურა დაეწყოთ.
• საკონსტიტუციო სასამართლომ პარლამენტის წევრების [ირაკლი კობახიძის, შალვა პაპუაშვილის, მამუკა მდინარაძის და სხვების, სულ 80 წევრის] კონსტიტუციური წარდგინება პრეზიდენტის იმპიჩმენტთან დაკავშირებით 22 სექტემბერს მიიღო.

რა მოხდა სასამართლოზე: სანამ უშუალოდ საქმის განხილვა დაიწყებოდა, სასამართლოს თავმჯდომარემ, მერაბ ტურავამ ყურადღება გაამახვილა იმაზე, რომ პროცესს სალომე ზურაბიშვილი არ ესწრებოდა.

• "პრეზიდენტს გადაადგილება არ უჭირს, რომ თვითონ შეეძლო მოსულიყო, მაგრამ არ ჩათვალა მიზანშეწონილად", — აღნიშნა ტურავამ და იმედი გამოთქვა, რომ ეს არ იყო მისი მხრიდან სასამართლოსადმი უპატივცემულობის გამოხატვა.
• ზურაბიშვილის ერთ-ერთმა წარმომადგენელმა, მაია კოპალეიშვილმა განმარტა, რომ ის და მისი კოლეგა, თამარ ჩუგოშვილი პრეზიდენტის ნდობით აღჭურვილი პირები არინა და სასამართლოზე მას წარმოადგენენ.
• "თუ თქვენ პრეზიდენტის წარმომადგენლის არსებობა არ გაკმაყოფილებთ, მაშინ, ბატონი ირაკლი წარმოადგენს 80 დეპუტატს და ყველა უნდა მოგეწვიათ", — აღნიშნა კოპალეიშვილმა.
• მერაბ ტურავამ, დაახლოებით, 15 წუთი დაუთმო კითხვა-პასუხს იმასთან დაკავშირებით, ფლობდნენ თუ არა კოპალეიშვილი და ჩუგოშვილი საჭირო ინფორმაციას იმისთვის, რომ პრეზიდენტის სრულფასოვანი წარმომადგენლები ყოფილიყვნენ.

წარდგინების ავტორთა არგუმენტები: სიტყვით გამოსვლისას ირაკლი კობახიძემ თქვა, რომ პრეზიდენტის უფლებამოსილებას საგარეო ურთიერთობების საკითხებში ადგენს მხოლოდ 52-ე მუხლი, რომლის თანახმადაც, მას მხოლოდ მთავრობის თანხმობით შეუძლია წარმომადგენლობითი უფლებამოსილების განხორციელება და მოლაპარაკებების წარმოება.

• "პრეზიდენტმა ითხოვა თანხმობა, არ მიუღია თანხმობა, მაინც განახორციელა ვიზიტი, დაირღვა კონსტიტუცია", — თქვა კობახიძემ.
• მან ხაზი გაუსვა იმასაც, რომ პრეზიდენტმა თავად ითხოვა თანხმობა, რაც როგორც კობახიძე ამბობს, ნიშნავს იმას, რომ პრეზიდენტს გაცნობიერებული ჰქონდა, რომ ასეთი ვიზიტი საჭიროებდა თანხმობას.
• "ასევე მისი ვიზიტები არ იყო დაფინანსებული ბიუჯეტიდან, მისი კერძო ხარჯებით იყო გამგზავრებული საზღვარგარეთ, რაც არის მორიგი აღიარება. თუ ლეგიტუმური იყო ვიზიტი, რატომ არ დააფინანსა ბიუჯეტიდან?!" — განაცხადა კობახიძემ.
• გარდა ამისა, კობახიძე საუბრობს იმაზეც, რომ საქართველოს კონსტიტუციით აღმასრულებელი ხელისუფლება ეკუთვნის მხოლოდ მთავრობას.

პრეზიდენტის წარმომადგენელთა არგუმენტები: კოპალეიშვილის განცხადებით, სალომე ზურაბიშვილის ევროპული ვიზიტები სრულიად თავსდება საქართველოს პრეზიდენტისთვის კონსტიტუციით მინიჭებულ უფლებამოსილებაში, რომლის განხორციელებისთვისაც მას მთავრობის თანხმობა არ სჭირდება.

• კოპალეიშვილი ამბობს, რომ კონსტიტუციის 49-ე მუხლით განსაზღვრულია პრეზიტენტის ფაქტობრივი სტატუსი.
• "პრეზიდენტი არის სახელმწიფოს მეთაური, ქვეყნის ერთიანობისა და ეროვნული დამოუკიდებლობის გარანტი, საქართველოს თავდაცვის ძალების უმაღლესი მთავარსარდალი".
• კოპალეიშვილის თქმით, პრეზიდენტს, როგორც ამ სტატუსის მქონე ადამიანს, 49-ე მუხლის მესამე პუნქტი ანიჭებს უფლებამოსილებას დამოუკიდებლად, მთავრობის სპეციალური თანხმობის გარეშე წარმოადგინოს საქართველო საგარეო ურთიერთობაში.
• როგორც კოპალეიშვილი განმარტავს, ზურაბიშვილის ვიზიტები არ შეიძლება განვიხილოთ 52-ე მუხლის ფარგლებში, რადგან ის არ ყოფილა წარმომადგენლობითი უფლებამოსილების განხორციელება, ვინაიდან არ იყო პოლიტიკურ შედეგზე ორიენტირებული.
• მისი თქმით, ამ საკითხთან დაკავშირებით პოლიტიკური შედეგი და პოლიტიკური ნება გამოხატა მთავრობამ, როცა წარადგინა განაცხადება ევროინტეგრაციასთან დაკავშირებით, პრეზიდენტის ვიზიტები კი იყო ამ განსაზღვრული პოლიტიკური მიზნის მხარდაჭერა.
• პრეზიდენტის წარმომადგენელი ამბობს, რომ სასამართლომ უნდა განსაზღვროს, ზურაბიშვილი 52-ე მუხლის ფარგლებში მოქმედებდა თუ 49-ე მუხლის ფარგლებში.

დეტალები: პრეზიდენტის იმპიჩმენტის საკითხის განხილვა საკონსტიტუციო სასამართლოში ხვალ, 4 ოქტომბერს გაგრძელდება.

• დღევანდელი განხილვას სალომე ზურაბიშვილი სოციალური ქსელით გამოეხმაურა.
• "მადლობა ჩემს წარმომადგენლებს, რომლებმაც უპრეცედენტო სასამართლო პროცესზე გაუძლეს ყველანაირ ფსიქოლოგიურ, მორალურ ზეწოლასა და შეურაცხყოფას როგორც ჩემი, ასევე მათი მისამართით და აბსურდული ბრალდებებისა და არარსებული მტკიცებულებების პირობებში ღირსეულად დაიცვეს პრეზიდენტის ინსტიტუტი", — დაწერა მან.