რა ხდებოდა ფრენებსა და უვიზო რეჟიმზე: რუსეთთან უვიზო რეჟიმი 2008 წლის აგვისტოს ომის შემდეგ გაუქმდა, 2012 წელს კი საქართველოს მხრიდან ცალმხრივად აღდგა. ხოლო პირდაპირი ფრენები 2019 წლის 20 ივნისის შემდეგ ვლადიმერ პუტინმა თავად აკრძალა.

• მაშინ, როცა ცივილიზებული მსოფლიო ოკუპანტ ქვეყანას სანქციებს უწესებს და იზოლაციაში აქცევს, საქართველო სანქციებს არ უერთდება, თან ქართული ოცნების ხელისუფლების მხრიდან რუსეთთან ურთიერთობის დათბობის მცდელობები უკვე დიდი ხანია შესამჩნევია.
• სერგეი ლავროვიც კი ამბობდა, რომ მმართველი გუნდის გადაწყვეტილებებით კმაყოფილები არიან და შესაბამის დიპლომატიურ ნაბიჯებს გადადგამდნენ.
• 2022 წლის დეკემბერში რუსეთის საგარეო საქმეთა მინისტრის მოადგილემ თქვა ისიც, რომ თანამშრომლობა ვითარდებოდა და თუ ასე გაგრძელდებოდა, უვიზო რეჟიმის გაუქმებასაც არ გამორიცხავდნენ.
• 2023 წლის თებერვალში რუსეთის ფედერაციის საბჭოს საერთაშორისო საქმეთა კომიტეტის თავმჯდომარე კი ამტკიცებდა, რომ საქართველოდან პირდაპირი ფრენების აღდგენა შესთავაზეს.
• ქართულ ოცნებაში ამას არ ადასტურებდნენ, მაგრამ ფრენების აღდგენის იდეას ყოველთვის მიესალმებოდნენ.
• შედეგად, პუტინის ბრძანებით, 15 მაისიდან საქართველოს მოქალაქეებისთვის სავიზო რეჟიმი გაუქმდება.
• აგრესორმა პრეზიდენტმა, გაუქმა თავისივე შეზღუდვაც, რომელიც რუსულ ავიაკომპანიებს საქართველოში ფრენას უკრძალავდა.
• ფრენების აღდგენას სამოქალაქო საზოგადოება კრიტიკით შეხვდა — რუსულ საჰაერო ხომალდებს ქართულ აეროპორტებში დაშვებისას აქციებით ხვდებოდნენ.

რა თქვა ლავროვმა ახლა: ერთ-ერთ ბოლო ინტერვიუში მან განაცხადა, რომ როცა დაინახეს, თბილისის ამჟამინდელი ხელისუფლება დაინტერესებული იყო ურთიერთობის ნორმალიზებით ფრენების განახლებაზე შეთანხმდნენ.

• "ჩვენ შევთანხმდით ბატონ ღარიბაშვილის მთავრობასთან ფრენების განახლებაზე და გაუქმდა სავიზო რეჟიმი. ვინაიდან რუსეთის მოქალაქეებისთვის უვიზო რეჟიმი უკვე საკმაოდ დიდი ხანია არსებობდა და ბევრმა ჩვენმა მოქალაქემ გამოიყენა იგი".

რა თქვა ღარიბაშვილმა: ლავროვის განცხადება მაშინვე განხილვის საგანი გახდა, რადგან საქართველოს მთავრობა ამტკიცებდა, რომ რუსეთმა ისევე ცალმხრივად მიიღო ფრენების აღდგენის გადაწყვეტილება, როგორც თავის დროზე გაუქმების.

• დღეს ჟურნალისტმა გაიხსენა პრემიერის ეს განცხადება და ლავროვის ბოლო ნათქვამს შეადარა. მან ირაკლი ღარიბაშვილს ჰკითხა: "ლავროვი ტყუის, თუ თქვენ მოგვატყუეთ".
• რასაც ღარიბაშვილმა ასე უპასუხა: "ძალიან ჩამჭრელი შეკითხვაა, არ ვიცი როგორ გიპასუხოთ. ძალიან მარტივად არის საქმე. ახლა მაგას პატარა ბავშვიც მიხვდება. ჯერ ერთი, მანამდე გაგახსენებთ, რომ რუსეთის პრეზიდენტმა თქვა, რომ ეს იყო მისი ერთპიროვნული გადაწყვეტილება — უვიზო რეჟიმის და ფრენების აღდგენა. ეს ერთი. ახლა, დღეს რაც თქვა ბატონმა ლავროვმა, ეს არის ფაქტის კონსტატაცია. რა თქმა უნდა, მოხდა გაფორმება ამ შეთანხმების საქართველოს მთავრობასთან. კერძოდ, ეკონომიკის სამინისტროს საავიაციო სააგენტო, ბუნებრივია, თანხმობას აძლევს შესაბამის უწყებას და შესაბამის რუსულ კომპანიებს. ამ შეთანხმებაზეა საუბარი და რა არის ამაში გაუგებარი? რა სკანდალი ნახეთ ამაში? რა აღმოაჩინეთ?"
• ღარიბაშვილი ამტკიცებდა, რომ მათ ფარულად არაფერი გაუკეთებიათ და მხოლოდ მიესალმნენ რუსეთის გადაწყვეტილებას, რადგან ეს კარგი ნაბიჯი იყო.
• ჟურნალისტმა აღნიშნა, რომ რუსეთის მაღალჩინოსანმა, კალაშნიკოვმა მათ დაუდასტურა, ფარცხალაძე ფრენებთან დაკავშირებულ მოლაპარაკებებში იყო ჩართული. კითხვაზე ადასტურებს თუ არა ამას, ღარიბაშვილმა ასე უპასუხა:
• "არავითარი რაიმე ტიპის ფორმალური მოლაპარაკებები, მითუმეტეს მთავრობის სახელით, არ გამართულა. ეს იყო რუსეთის ხელისუფლების გადაწყვეტილება, რომელიც შემდეგ ჩვენმა მთავრობამ ასე ვთქვათ დაამოწმა, მოიწონა და გააფორმა. მე გიდასტურებთ, რომ მთავრობის სახელით არავის... ჩვენი, ჩემი, მთავრობის სახელით არავის ფორმალური მოლაპარაკება ამ საკითხზე არ გაუმართავს. ეს იყო რუსეთის ხელისუფლების გადაწყვეტილება".