რა ხდებოდა აქამდე: 14 სექტემბერს პრეზიდენტმა პარლამენტს ეროვნული ბანკის საბჭოს წევრობის კანდიდატებად ნანა ყეინიშვილი და თეიმურაზ ხომერიკი წარუდგინა.

• ამის შემდეგ აშშ-მ ოთარ ფარცხალაძე დაასანქცირა, ეროვნულმა ბანკმა ჯერ სანქციებით გათვალისწინებული წესი აამოქმედა, შემდეგ კი პრეზიდენტის მოვალეობის შემსრულებელმა, ნათია თურნავამ საქართველოს მოქალაქეებისთვის საგამონაკლისო ბრძანება გამოსცა, რითიც ფარცხალაძეს ანაგარიშებზე წვდომა აღუდგა.
• ამ მოვლენებს გუშინ, 20 სექტემბერს ეროვნული ბანკის 3 ვიცეპრეზიდენტის და ნათია თურნავას მრჩეველის გადადგომა მოჰყვა.
• სალომე ზურაბიშვილმა კი განაცხადა, რომ თავად თურნავაც უნდა გადადგეს.

რა მოხდა დღეს: 21 სექტემბერს კომიტეტის სხდომაზე ნანა ყეინიშვილისა და თეიმურაზ ხომერიკისთვის უნდა მოესმინათ, თუმცა ისინი არ გამოცხადდნენ.

• პრეზიდენტის საპარლამენტო მდივანმა განაცხადა, რომ ამ ეტაპზე პრეზიდენტი უარს აცხადებს, კანდიდატების წარდგენაზე.
• "პრეზიდენტს არ მიაჩნია, რომ არსებულ ვითარებაში, როცა არ არის ნათელი საქართველოს ეროვნული ბანკი ქართველ ხალხს თუ კონკრეტულ პირებს ემსახურება, ამ ვითარებაში წარმოადგინოს ეროვნული ბანკის საბჭოს წევრის კანდიდატები, შესაბამისად, კანდიდატებიც არ არიან კომიტეტზე წარმოდგენილნი. აღნიშნულ მდგომარეობაში, სანამ არ გაირკვევა ეროვნული ბანკის გარშემო სიტუაცია, ჩვენ უარს ვაცხადებთ კანდიდატურების წარმოდგენაზე", — აღნიშნა მან.
• ამავე სხდომაზე მმართველი გუნდის დეპუტატმა, ირაკლი ზარქუამ განაცხადა, რომ კანდიდატები უკვე წარდგენილი იყვნენ და მათი უკან გაწვევის მექანიზმი არ არსებობს.
• "პრეზიდენტმა თავისი ურჩობით წარმოადგინა 2 კანდიდატი, რომელიც არ იყო კონსულტაციის შედეგად შერჩეული, თქვენ აპრიორი იცით, რომ პარლამენტის კომიტეტის უმრავლესობა მხარს არ დაუჭერდა და ამიტომ, რომ არ შერცხვეთ, უკან გაწვევის მექანიზმები აამუშავეთ", — განაცხადა ზარქუამ.
• სხდომის შემდეგ კომიტეტის თავმჯდომარემ, პაატა კვიჟინაძემ ჟურნალისტებთან განმარტა, რომ პრეზიდენტი კანდიდატებს უკან გაწვევის მექანიზმი არ აქვს, მაგრამ წარმოუდგენელი იქნებოდა მხარი დაეჭირათ იმ ხალხისთვის, რომლებიც სხდომაზე არ მივიდნენ.
• შესაბამისად, კომიტეტმა მათზე უარყოფითი დასკვნა გაგზავნა.

ამის მიუხედავად, პლენარულ სხდომაზე ეროვნული ბანკის საბჭოს წევრობის კანდიდატებს მხარი დაუჭირეს.

• ნანა ყეინიშვილის არჩევას 84-მა დეპუტატმა მისცა ხმა, წინააღმდეგი არავინ ყოფილა;
• ხოლო თეიმურაზ ხომერიკს 82-მა დაუჭირა მარი მოწინააღმდეგე — 0.
• კობახიძის განმარტებით, კომიტეტის სხდომის შემდეგ უმრავლესობა შეიკრიბა და გადაწყვიტა, ორივე წევრი აერჩიათ.
• მისივე მტკიცებით, გუშინ ეს კანდიდატები პრეზიდენტთან დაიბარეს და მოსთხოვეს განცხადების დაწერა უართან დაკავშირებით.

ამ ეტაპზე ეროვნულ ბანკში 4 წევრია დარჩენილი, რადგან 3 ვიცეპრეზიდენტი წამოვიდა.

• 1 თავად ნათია თურნავაა, ხოლო დანარჩენი 3 — ეკატერინე მიქაბაძე, ეკატერინე გალდავა და რობერტ სინგლეტარი.
• 2 ახალი წევრის არჩევით, მათი რაოდენობა 6-მდე გაიზარდა, თუმცა უცნობია, რას იტყვიან თავად პრეზიდენტის წარდგენილი კანდიდატები, რომლებმაც მოსმენაზე მისვლაზეც კი უარი თქვეს.