დეტალები: ეროვნული ბანკიდან წასვლის შესახებ დღის განმავლობაში საბჭოს 2-მა წევრმა და ამავდროულად ვიცეპრეზიდენტებმა, პაპუნა ლეჟავამ და არჩილ მესტვირიშვილმა განაცხადეს.

• მოგვიანებით ცნობილი გახდა, რომ თანამდებობას ეროვნული ბანკის პრეზიდენტის მრჩეველი გიორგი ბაქრაძეც ტოვებს.
• ახლა კი რადიო თავისუფლებას კიდევ ერთმა ვიცეპრეზიდენტმა, ნიკოლოზ გაგუამ დაუდასტურა, რომ ისიც მიდის.
• სამი ვიცეპრეზიდენტის და მრჩეველის წასვლა საქართველოს პრეზიდენტმა ბრიფინგზე დაადასტურა.
• ამ ეტაპზე პრეზიდენტის მოვალეობის შემსრულებელ თურნავას აღარც ვიცეპრეზიდენტები ჰყავს და აღარც — მრჩეველი.
• ამავდროულად, საბჭოს 2 წევრი, ეკატერინე გალდავა და ეკატერინე მიქაბაძე ბიემჯისთან აცხადებენ, რომ ამ ეტაპზე სებ-ის საბჭოს დატოვებას არ აპირებენ.

გადაწყვეტილებები დროში ემთხვევა ეროვნული ბანკის მიერ საერთაშორისო სანქციების საკითხში გამონაკლისის დაშვებას.

• შესაბამისად, ეროვნული ბანკის პრეზიდენტის მოვალეობის შემსრულებელს, ნათია თურნავას დილით კითხეს, რა მიზეზით დატოვა ლეჟავამ თანამდებობა — ამ დროისთვის მხოლოდ მისი გადადგომა იყო ცნობილი.
• "სხვადასხვა პიროვნებას, ჩემს კოლეგას თუ ყოფილ კოლეგას ჰქონდეს თავისი შეხედულებები ამა თუ იმ გადაწყვეტილებასთან დაკავშირებით, მაგრამ ჩემთვის ეჭვგარეშეა, რომ როცა საქმე ეხება ეროვნული ბანკის მიერ საქართველოს კონსტიტუციის აღსრულებას და მასთან შესაბამისობას და საქართველოს მოქალაქეების ფუნდამენტური უფლებების დაცვას, აქ ორი აზრი არ უნდა არსებობდეს", — თქვა მან.
• დამაზუსტებელ კითხვაზე — ანუ ლეჟავა არ დაეთანხმა თურნავას პოზიციას, ეროვნული ბანკის პრეზიდენტის მოვალეობის შემსრულებელმა თქვა: "თქვენ შეგიძლიათ, მას გაესაუბროთ".

პრეისტორია: 14 სექტემბერს აშშ-ის სახელმწიფო დეპარტამენტმა სანქციების ახალ პაკეტზე განაცხადა — სანქცირებულთა სიაში მოხვდა საქართველოს ყოფილი გენერალური პროკურორი, ოთარ ფარცხალაძეც, რომელიც სახელმწიფო დეპარტამენტის განცხადებაში მოხსენიებულია, როგორც ქართველი-რუსი ოლიგარქი.

• დოკუმენტში ასევე აღნიშნულია, რომ ონიშჩენკომ და FSB-მ ფარცხალაძე გამოიყენეს "ქართულ საზოგადოებასა და პოლიტიკაზე რუსეთის საკეთილდღეო გავლენის მოხდენისთვის".
• 18 სექტემბერს, ბიემჯიმ გაავრცელება ინფორმაცია, რომ საერთაშორისო ფინანსური სანქციების აღსრულების მექანიზმის გათვალისწინებით საქართველოს ეროვნულმა ბანკმა ფარცხალაძეს მის საკუთრებაში არსებულ საბანკო ანგარიშებზე წვდომა შეეზღუდა.
• ეროვნული ბანკის გადაწყვეტილებას ფარცხალაძის ანგარიშების გაყინვასთან დაკავშირებით, ირაკლი კობახიძემ არაკონსტიტუციური უწოდა.
• მისი თქმით, უცხოელს შეიძლება შეეზღუდოს გარკვეული კომერციული საქმიანობა, მაგრამ "როცა საქართველოს მოქალაქეს ეხება საქმე, სახელმწიფო განსხვავებული პასუხისმგებლობით მოქმედებს".
• კრიტიკის შემდეგ, 19 სექტემბერს, სებ-მა გამოსცა ბრძანება სანქციათა შესრულების წესში ცვლილების შეტანის შესახებ.
• ცვლილება იმეორებს კობახიძის რიტორიკას და გულისხმობს გამონაკლისის დაშვებას საქართველოს მოქალაქეებთან მიმართებით.
• ბრძანების თანახმად, საქართველოს მოქალაქეებზე სანქციათა რეჟიმი ამოქმედდება იმ შემთხვევაში, თუ მათ მიმართ საქართველოს სასამართლოს მიერ გამოტანილი იქნება გამამტყუნებელი განაჩენი.
• ბრძანებას ხელს ეროვნულო ბანკის პრეზიდენტი, ნათია თურნავა აწერს და ის გამოქვეყნებისთანავე შევიდა ძალაში.
• დღეს გამართულ ბრიფინგზე მან განაცხადა, რომ ეს არ არის მიმართული ვინმეს დაცვისაკენ და ცვლილება ეხება მხოლოდ და მხოლოდ საქართველოს მოქალაქეებს.