სურსათის ეროვნული სააგენტო აცხადებს, რომ მათ 2017 წელს, სარეალიზაციო ბაზარზე არსებული სხვადასხვა ობიექტიდან უკვე აიღეს 60-მდე ნიმუში, რომლებიც გაგზავნილია კვლევისთვის აკრედიტირებულ ლაბორატორიაში და დეტალური ინფორმაცია შედეგების შესახებ მიმდინარე კვირის განმავლობაში გახდება ცნობილი. ამ დროისთვის არსებული ლაბორატორიული კვლევით წელს ერთ ნიმუშშია აღმოჩენილი დარღვევა.

„სრული პასუხისმგებლობით ვაცხადებთ, რომ ადგილობრივ ბაზარზე მუდმივად მიმდინარეობს მონიტორინგი ტყვიის შემცველობაზე სხვადასხვა სურსათში, მათ შორის სუნელებში. არსებული მონაცემებით მასშტაბური დარღვევები არ აღინიშნება და ქართული სუნელები შეზღუდვის გარეშე გადის 30-ზე მეტ ქვეყანაში,მათ შორის ევროკავშირის ქვეყნებში“ - სურსათის ეროვნული სააგენტოს უფროსის, ზურაბ ჩეკურაშვილის აღნიშნული განცხადება სააგენტომ გაავრცელა.

სააგენტოსვე ინფორმაციით, ისინი მუდმივად ახორციელებენ მონიტორინგს მიკრობიოლოგიურ მაჩვენებლებსა და ტოქსიკურ ელემენტებზე, მათ შორის ტყვიის შემცველობაზე სუნელებში. ამ მიზნით 2015-2016 წლებში აღებულია 38 ნიმუში, საიდანაც ტყვიის შემცველობა დასაშვებ ნორმას აღემატებოდა ერთ შემთხვევაში.

აგრეთვე,ადგილობრივი ბაზრის დაცვის მიზნით, შემოსავლების სამსახურთან ერთად გამკაცრებულია კონტროლი მესამე ქვეყნებიდან ნედლეულის შემოტანაზე.

On.ge-მ რამდენიმე დღის წინ გაავრცელა ინფორმაცია, რომ ნიუ-იორკის ჯანდაცვის დეპარტამენტი უკვე წლებია ქართული სუნელების პოტენციურ მომხმარებლებს აფრთხილებს ქართულ სუნელებში ტყვიის შესაძლო შემცველობაზე. როგორც ჯანდაცვის დეპარტამენტის პრესსპიკერმა, კაროლინა როდრიგესმა On.ge-ს უთხრა, მათ მიერ შემოწმებულ ნიმუშებში ტყვიის საგანგაშო დოზა აღმოჩენილია 2017 წელსაც და შესაბამისად, მათი გაფრთხილება ამის შესახებ, დღემდე ძალაშია.