რატომ არის მნიშვნელოვანი: აგვისტოში საინფორმაციო სააგენტო cnews-მა გაავრცელა ფოტოები, რომლებიც ირაკლი ღარიბაშვილის აშშ-ში ყოფნისას, მანჰეტენზეა გადაღებული.

  • მომხდარს საზოგადოებასა და პოლიტიკურ წრეებში უკმაყოფილება მოჰყვა.
  • ღარიბაშვილს ორმაგ სტანდარტებში ადანაშაულებდნენ, ამბობდნენ, რომ ქვეყანა რუსული გზით მიჰყავს, თავად კი აშშ-ში ისვენებს.
  • გაიჟღერა ბრალდებებმა მგზავრობის ხარჯების დაფინანსებასთან დაკავშირებითაც.
  • გუშინ, TV პირველის გადაცემაში, ნოდარ მელაძის შაბათი, ჯორჯიან ეარვეისის ხელმძღვანელმა, თამაზ გაიაშვილმა თქვა, რომ ირაკლი ღარიბაშვილი გერმანიაში, მიუნხენში მისმა კომპანიამ წაიყვანა.
  • "თვითმფრინავი მათია, ჯორჯიან ეარვეისი ემსახურება", — უთხრა მან TV პირველის ჟურნალისტს.
  • სიუჟეტს გამოეხმაურა მთავრობის სტრატკომი, რომელიც ისევ ამტკიცებს, რომ საზოგადოების შეცდომაში შეყვანის მიზნით ცრუ ინფორმაცია მიზანმიმართულად ვრცელდება და ღარიბაშვილის მოგზაურობის ხარჯი სახელმწიფო ბიუჯეტიდან არ გაწეულა.

დეტალები: TV პირველის მიერ მომზადებულ სიუჟეტზე კომენტარი გააკეთეს სამოქალაქო საზოგადოების ორგანიზაციებმაც.

  • მათი თქმით, სიუჟეტში შესაძლო დანაშაულის ნიშნებია მოცემული და პროკურატურას მოუწოდებენ, დაუყოვნებლივ დაიწყოს გამოძიება.
  • "ეს არ არის პირველი შემთხვევა, როცა პრემიერმინისტრისა და მისი ოჯახის წევრების ირგვლივ გავრცელებული ინფორმაცია იწვევს ღარიბაშვილის თანამდებობის ან მასთან დაკავშირებული შესაძლებლობის ბოროტად, ქონებრივი ან სხვა სიკეთის მიღების მიზნით გამოყენების ეჭვებს", — აღნიშნულია NGO-ების განცხადებაში.