ამერიკელმა მომღერალმა და მსახიობმა ტეილორ მომსენმა პოპულარობა ადრეულ ასაკშივე მოიპოვა, როცა 2000 წელს გამოსულ ფილმში როგორ მოიპარა გრინჩმა შობა ჯიმ კერისთან ერთად ითამაშა და ერთ-ერთი მთავარი გმირი, სინდი ლუ, განასახიერა. როლმა 7 წლის მსახიობს საყოველთაო ცნობადობა მოუტანა, თუმცა, მომსენი დღეს უკვე იხსენებს, რომ ამ ყველაფერმა მის ცხოვრებაზე მხოლოდ დადებითი გავლენა არ მოახდინა.

"გრინჩმა ჩემი ცხოვრება ბევრი მხრივ შეცვალა", — ჰყვება მომსენი, — "ერთ-ერთი ისაა, რომ ულმობლად დამცინოდნენ ხოლმე. ყოველ ჯერზე, როცა სკოლას ვიცვლიდი ან სადმე სხვაგან მივდიოდი, ბავშვებს ჩემი სახელი დავიწყებული ჰქონდათ. 'გრინჩის გოგოს' მეძახდნენ. ჩემი პერსონაჟის სახელსაც კი არა — მხოლოდ 'გრინჩის გოგოს'. თანდათან მივეჩვიე, მაგრამ ამის გამო გავუცხოვდი".

ასეთი გამოცდილების მიუხედავად, მსახიობს ფილმი მაინც უყვარს და იმასაც ხსნის, რატომ არ კარგავს გრინჩი პოპულარობას წლების შემდეგ.

"ალბათ იმიტომ უყვართ, რომ ამბის ძირითადი აზრი ძალიან კეთილშობილური და გულის ამაჩუყებელია", — განაცხადა მომსენმა 2020 წელს, — "და ეს ყოველ წელს მეორდება, ამიტომ მოუთმენლად ველოდებით ხოლმე. ამ ფილმს ხომ ბედნიერება და სიხარული მოაქვს ყველასთვის, ვინც მას უყურებს".

ფოტო: Universal Pictures

როგორ მოიპარა გრინჩმა შობა უკვე კლასიკად ქცეული სადღესასწაულო ფილმია. ის დოქტორი სიუზის ამავე სახელწოდების მქონე საბავშვო წიგნს ეფუძნება. კინოსურათმა $346 მილიონამდე გამოიმუშავა და 2000 წლის ერთ-ერთი ყველაზე წარმატებული პროექტი გახდა. გრინჩმა ოსკარიც მოიპოვა საუკეთესო გრიმის ნომინაციაში.

რაც შეეხება მომსენს, მან მოგვიანებით კიდევ ერთ წარმატებულ პროექტში, თინეიჯერულ სერიალ Gossip Girl-ში, მიიღო მონაწილეობა. 2009 წლიდან კი იგი მეტწილად მუსიკაზე გადაერთო და როკჯგუფ The Pretty Reckless-ის ფრონტვუმენი გახდა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...