რატომ არის მნიშვნელოვანი: ნოვაია გაზეტას ცნობით, 16-17 აგვისტოს საქართველოში უკრაინის 6 მოქალაქე არ შემოუშვეს.

  • გამოცემის თანახმად, ისინი ყოფილი ტყვეები არიან, რომლებიც რუსმა სამხედროებმა ხერსონიდან იძულებით წაიყვანეს.
  • ნოვაია გაზეტა წერს, რომ უკრაინის მოქალაქეებს საზღვრის კვეთაზე უარი "სხვა მიზეზებით" ეთქვათ.
  • მედიის ინფორმაციით, სანამ ქვეყანაში შემოშვების თხოვნით უფლებადამცველები ყველა შესაძლო ინსტანციას მიმართავენ, რუსეთის უსაფრთხოების ძალები უკრაინელების გატაცებას ცდილობენ.

დეტალები: უფლებადამცველი ორგანიზაციის, Unmode-ის ხელმძღვანელის თქმით, 6 პირი ამჟამად ლარსის საბაჟო გამშვები პუნქტის ნეიტრალურ ზონაში იმყოფება.

  • "FSB-ის თანამშრომლები სამოქალაქო მანქანით მივიდნენ, თვითონაც სამოქალაქო ტანსაცმელში იყვნენ გამოწყობილები. ერთ-ერთი უკრაინელის მანქანაში ჩასმა სცადეს, დანარჩენებმა კი ამის საშუალება არ მისცეს. დასახმარებლად ქართველი მესაზღვრეები გამოიქცნენ. ახლა ისინი მალავენ ბიჭებს თავიანთ ტერმინალში", — ამბობს აიდანა ფედოსიკი გამოცემასთან.
  • მისივე განცხადებით, მესაზღვრეები უკრაინელებისთვის აუცილებელი ნივთების გადაცემის უფლებას არ აძლევენ.
  • "ყოფილ პატიმრებს შორის ერთი აივ დადებითია. მას უკვე ოთხი დღეა წამლები დაუმთავრდა. მისი ფიზიკური და ფსიქიკური მდგომარეობა ყოველდღიურად შესამჩნევად უარესდება", — წერს გამოცემა.

შსს: On.ge ამ საკითხზე შინაგან საქმეთა სამინისტროს დაუკავშირდა.

  • უწყებაში გვითხრეს, რომ ოფიციალური კომენტარი ჯერ აქვთ და თავად დაგვიკავშირდებიან.