ხშირად ჰგონიათ, რომ თინეიჯერები აღარ კითხულობენ, ჰყავთ მხოლოდ ვირტუალური მეგობრები და თავისუფალ დროს უმეტესად კომპიუტერულ თამაშებთან ერთად ატარებენ. საქართველოს ბანკის იდეათეკების ერთგული მკითხველები კი მსგავს სკეპტიკურ წარმოდგენებს აქარწყლებენ.

14 წლის ალექსანდრე დობორჯგინიძე თბილისის 146-ე საჯარო სკოლაში სწავლობს, მე-10 კლასშია და სურს, არქიტექტორი გახდეს. სამომავლო მიზნების მისაღწევად საქართველოს ბანკის იდეათეკას ხშირად სტუმრობს, რადგან იქაური გარემო ძალიან მოსწონს. იდეათეკის მრავალფეროვანი არჩევანიდან უპირატესობას ისტორიული ჟანრის წიგნებსა და რომანებს ანიჭებს.

წაიკითხეთ ალექსანდრეს 2 საყვარელი წიგნის შესახებ, რომლებიც იდეათეკაში აღმოაჩინა.

ავსტრიელი დრამატურგისა და რომანისტის, თომას კენილის ბიოგრაფიული რომანი — შინდლერის სია მოგვითხრობს ამბავს ოსკარ შინდლერის შესახებ, რომელმაც ჰოლოკოსტის დროს ასობით ებრაელი იხსნა სიკვდილისგან. როგორც ალექსანდრე ამბობს, წიგნის დასასრულმა დიდი საფიქრალი და ემოცია დაუტოვა.

"ვფიქრობ, ყველა ჩემმა თანატოლმა უნდა წაიკითხოს ეს წიგნი. შინდლერის სია არის უანგარო სიკეთისა და გმირობის მაგალითი, ყველას ასწავლის, რომ ერთ ადამიანსაც კი შეუძლია სამყაროს შეცვლა, თუ ის ამას მოინდომებს".

მეორე გამორჩეულ წიგნად ალექსანდრე ქართველი ავტორის, თემურ ბაბლუანის სათავგადასავლო რომანს — მზე, მთვარე და პურის ყანა ასახელებს.

"წიგნი არის ერთი თბილისელი შეყვარებული ბიჭის შესახებ, რომელიც სხვისი დანაშაულის გამო იხდიდა სასჯელს, მისმა განვლილმა ცხოვრებამ და თავგადასავლებმა ძალიან დამაინტერესა. რომ შემეძლოს, წიგნის რომელიმე პერსონაჟი ვიყო, ალბათ ამ წიგნში ვიცხოვრებდი და მთავარი პერსონაჟი, ჯუდე ანდრონიკაშვილი ვიქნებოდი. წიგნის კითხვა რომ დავასრულე, ის განცდა დამრჩა, რომ ცხოვრებაში რაც უნდა ცუდი მოხდეს, არ უნდა დანებდე და წინსვლა უნდა განაგრძო".

საქართველოს ბანკის იდეათეკის ხშირი სტუმრების რეკომენდაციები ზაფხულში საკითხავი წიგნების შესახებ ამით არ სრულდება, ისინი საკუთარ თანატოლებს კიდევ უფრო მეტი საინტერესო ავტორებისა და პერსონაჟების გაცნობას ჰპირდებიან.

ინფორმაციისთვის, საქართველოს ბანკი ქვეყანაში განათლების ხარისხისა და ხელმისაწვდომობის გაზრდისთვის არაერთ პროექტს ახორციელებს და უჭერს მხარს. სწორედ ამ მიზნით შეიქმნა საქართველოს ბანკის იდეათეკა - მულტიფუნქციური განათლების სივრცე რეგიონის სკოლებში, რომელიც თითოეულ ლოკაციაზე ახალგაზრდებს 2000-მდე წიგნსა და საგანმანათლებლო რესურსზე აძლევს წვდომას.

იდეათეკა აღჭურვილია თანამედროვე ტექნოლოგიებითა და მრავალფეროვანი ელექტრონული რესურსებით, რომელიც მოსწავლეებს აძლევს თავისუფლებას, იკითხონ, იფიქრონ და მომავლის შესაძლებლობები დაინახონ. ამჟამად 16 იდეათეკა ფუნქციონირებს როგორც თბილისის, ისე მაღალმთიანი რეგიონების, ეთნიკური უმცირესობით დასახლებული და სიღარიბის მაღალი მაჩვენებლის მქონე ქალაქების, საზღვრისპირა სოფლების სკოლებში. უახლოეს მომავალში კიდევ უფრო მეტი მსგავსი სივრცე გაიხსნება მომავალი თაობისთვის განათლების სრულფასოვანი პირობების შესაქმნელად.

საქართველოს ბანკის იდეათეკების შესახებ საინტერესო ინფორმაციის მისაღებად ეწვიეთ ბმულს.