თიბისი კონცეპტის მხარდაჭერით, წინანდლის ისტორიული მამული, 31 აგვისტოდან 10 სექტემბრის ჩათვლით, წინანდლის კლასიკური მუსიკის ფესტივალის საიუბილეო სეზონს უმასპინძლებს.

წინანდლის ფესტივალი მეხუთე, საიუბილეო სეზონზე, ცნობილი კლასიკური მუსიკოსებითა და პანკავკასიური ორკესტრით ბრუნდება. პანკავკასიური ახალგაზრდული ორკესტრი წინანდლის საერთაშორისო ფესტივალის ძირითადი სიმფონიური ორკესტრია.

ორგანიზატორების თქმით, ფესტივალი საიუბილეო სეზონისთვის განსაკუთრებით საინტერესო პროგრამით იქნება წარმოდგენილი.

"ფესტივალს 5 წელი უსრულდება. ხუთი წელი ეს ის ზღვარია, რომლის გადალახვის შემდეგ ფესტივალი სხვა განზომილებაში გადადის და მნიშვნელოვან ადგილს იმკვიდრებს ქვეყნის და საზოგადოების ცნობიერებაში. უაღრესად დატვირთული გრაფიკის მიუხედავად, წინანდლის ფესტივალის მუსიკალური ხელმძღვანელი ჯანანდრეა ნოზედა, წელს კვლავ ეწვევა წინანდალს. ეს ფესტივალის დამფუძნებლებისა და მთელი გუნდის დაუღალავი შრომის შედეგად მიღებული მნიშვნელოვანი შენაძენია", — აცხადებს დავით საყვარელიძე, წინანდლის ფესტივალის გენერალური დირექტორი.

საიუბილეო სეზონი პანკავკასიური ახალგაზრდული ორკესტრის კონცერტით გაიხსნება, რომელსაც მაესტრო ჯანანდრეა ნოზედა გაუწევს დირიჟორობას. ისინი შუმანისა და ჩაიკოვსკის ნაწარმოებებს შეასრულებენ.

11 დღიან პროგრამაში ცნობილი კლასიკური მუსიკოსები მიიღებენ მონაწილეობას, მათ შორის: მანფრედ ჰონეკი, ვახტანგ კახიძე და კრისტოფ კონცი, იეფიმ ბრონფმანი, ნობუიუკი ცუძი, ალექსანდრე მალოფეევი, მარკ ბუშკოვი, ზლატომირ ფანგი, ბეჰზოდ აბდურაიმოვი, აუგუსტინ ჰადელიხი, ამიჰაი გროში, ჟულიენ კანტონი, მაო ფუჯიტა, მიხაელ ბარენბოიმი, დევიდ გარეტი, ოლგა შეპსი, გოტიე კაპუსონი.

მსმენელის წინაშე წარდგებიან ქართველი მუსიკოსებიც: გიორგი გიგაშვილი და 13 წლის ცოტნე ზედგენიძე. ორ კონცერტს გამართავს ცნობილი მევიოლინე ლიზა ბათიაშვილი. 2 სექტემბრის პროგრამა ქართველი პიანისტის, ლექსო თორაძის ხსოვნას მიეძღვნება. სცენაზე ვიხილავთ მეცო-სოპრანო ირინა შერეზადაშვილსა და პიანისტ ნინო ჟვანიას. პროგრამაში ასევე შედის მსახიობ ნინო კასრაძის პერფორმანსი: ჟან კოქტო — "ადამიანის ხმა".

წინანდლის ფესტივალზე პანკავკასიურ ახალგაზრდულ ორკესტრს წელს მუსიკოსები 7 ქვეყნიდან უერთდებიან — საქართველო, სომხეთი, აზერბაიჯანი, თურქეთი, უკრაინა, ყაზახეთი, თურქმენეთი.

წინანდლის კლასიკური მუსიკის ფესტივალი 2019 წელს წინანდლის ისტორიული მამულში, კომპანია სილქნეტის მხარდაჭერით დაფუძნდა. საკონცერტო პროგრამისა და კლასიკური მუსიკოსების მოწვევის გარდა, ფესტივალის დაარსების იდეა საგანმანათლებლო და სამშვიდობო მიზნებს ემსახურება.

თიბისი კონცეპტის მომხმარებლებს, შესაძლებლობა აქვთ შეიძინონ ფესტივალის ფარგლებში გათვალისწინებული ნაკრებები 25%-მდე ფასდაკლებით და დაესწრონ წინანდლის ფესტივალს. ნაკრებების შესაძენად, უნდა დაუკავშირდნენ კონცეპტ ასისტენტს ნომერზე: 032 2 27 27 00.

ასევე, თიბისი კონცეპტის მომხმარებლებს, ფესტივალის ცალკეული ბილეთების შეძენა შეუძლიათ 15%-იანი ფასდაკლებით tkt.ge-ის ვებგვერდზე.