რა ხდება: გარემოს ეროვნული სააგენტო აცხადებს, რომ მიმდინარე კვირის განმავლობაში ჰაერის ტემპერატურა გასულ კვირასთან შედარებით 2-3ºC-ით დაიკლებს, თუმცა ქვეყნის ტერიტორია კვლავ რჩება თბური ტალღის ზემოქმედების ქვეშ.

  • მათივე ინფორმაციით, ცალკეულ დღეებში დასავლეთ საქართველოს დაბლობში ჰაერის ტემპერატურამ შესაძლებელია — 34ºC, 36ºC, აღმოსავლეთ საქართველოს ბარში 35ºC, 37ºC-ს მიაღწიოს.
  • ქვეყნის მთიან რაიონებში დღის მაქსიმალური ტემპერატურა 31ºC, 36ºC, მაღალ მთაში 26ºC, 31ºC-მდე მოიმატებს.
  • უწყება განმარტავს, რომ მოსალოდნელი მაღალი ტემპერატურები ტყის ხანძრებისა და მყინვარების დნობასთან დაკავშირებული პროცესების გააქტიურების ხელშემწყობ პირობებს წარმოადგენს.
  • საგანგებო სიტუაციების მართვის სამსახურმა მოქალაქეები ტყის ხანძრების რისკზე წინა კვირაში გააფრთხილა და პრევენციისთვის რეკომენდაციები გაავრცელა.

თბური ტალღები კლიმატის ცვლილების ერთ-ერთი ინდიკატორია. ის პირდაპირი მნიშვნელობით "ტალღად" არ უნდა აღვიქვათ — მსოფლიო მეტეოროლოგიური ორგანიზაციის თანახმად, ასე ეწოდება განსაკუთრებულად ცხელ პერიოდს, რომელიც რამდენიმე დღე გრძელდება.

  • ამ დროს ყოველდღიური მაქსიმალური ტემპერატურა საშუალო მაჩვენებელს 5°C-ით ან მეტით აჭარბებს, მსოფლიოს ამა თუ იმ ნაწილში განსხვავებული ნიშნულებია, რადგან კლიმატი ყველგან ერთნაირი არაა.
  • თბური ტალღები მაშინ იწყება, როცა დედამიწის ატმოსფეროში არსებული მაღალი წნევა თბილ ჰაერს ზედაპირისკენ უბიძგებს. შედეგად, ამ ჰაერის ტემპერატურა უფრო მეტად იზრდება, რადგან ის იკუმშება.
  • მაღალი წნევა ვერტიკალურად ვრცელდება, რაც ამინდის სხვა სისტემებსაც ცვლის, მაგალითად, ქარსა და ღრუბელს ამცირებს, გარემოს ჩახუთვას იწვევს და ა.შ. ამას ართულებს დაბალი ტენიანობაც, რაც ხშირად გვალვას ედება საფუძვლად.
  • ამ თემაზე დეტალურად შეგიძლიათ წაიკითხოთ ჩვენს სტატიაში.

რეკომენდაციები: იმის გარდა, რომ მსგავსმა თბურმა ტალღებმა შესაძლოა, გვალვა გამოიწვიოს, ისინი ადამიანის ჯანმრთელობისთვისაც საფრთხის შემცველია.

  • NCDC გირჩევთ, შეინარჩუნოთ სახლში სიგრილე და სახლში ტემპერატურა დილის 08:00 საათიდან 10:00 მდე, 13:00-ზე და ღამით 22:00 საათის შემდეგ შეამოწმოთ.

  • დღისით ოთახის იდეალური ტემპერატურა არ უნდა აღემატებოდეს 32 გრადუსს, ხოლო ღამით — 24 გრადუსს;

  • რეკომენდაციაა, ღამით გააღოთ ფანჯრები, დღისით კი შეამციროთ სახლში სიცხის შეღწევა;

  • მზის მხარეს ჩამოაფარეთ დამჩრდილავი ფარდები, ჟალუზები, დარაბები;
    ჩამოკიდეთ სველი პირსახოცები, რაც გაგრილებასთან ერთად სახლს დაატენიანებს;

  • თუ სახლში გაქვთ კონდიციონერი, დაკეტეთ კარები და ფანჯრები, რათა ეფექტურად გამოიყენოთ ელექტროენერგია. ეს აგაცილებთ ქვეყანაში ელექტრო ენერგიის დეფიციტის საფრთხეს;

  • მიიღეთ დიდი რაოდენობით სითხე.

  • რეკომენდაციების ვრცლად ნახვა შეგიძლიათ აქ.