როგორც აღმოჩნდა, ადამიანების მცირე ნაწილი ბუნებრივად რეზისტენტულია ჯერ კიდევ უკურნებელი აივ ინფექციების მიმართ და მეცნიერები ცდილობენ, ამის მიზეზები გაარკვიონ.

ახლახან მკვლევართა საერთაშორისო ჯგუფმა აფრიკული წარმოშობის ადამიანებში აღმოაჩინა ახალი გენეტიკური ვარიანტი, რომელიც, როგორც ჩანს, ზღუდავს აივ-ის რეპლიკაციას ინფექციის შეძენის შემდეგ.

მიუხედავად იმისა, რომ მათი დასკვნების დასადასტურებლად მეტი კვლევაა საჭირო, აღმოჩენა არის უზარმაზარი წინგადადგმული ნაბიჯი აივ-ის კვლევისთვის.

"აღმოჩენებმა შეიძლება ახსნას, თუ რატომ აქვთ ამ პოპულაციებში გარკვეულ ადამიანებს უფრო დაბალი ვირუსული დატვირთვა, რაც ანელებს ვირუსის გამრავლებასა და გადაცემას", — ამბობს კვლევის ავტორი, საიმონ მალალი, ავსტრალიის მერდოკის უნივერსიტეტიდან.

აღმოჩენამ, თითქმის, 3 900 ინდივიდის კომბინირებული ანალიზის შედეგად, შეიძლება ასევე გზა გაუხსნას ახალი ანტივირუსული პრეპარატების შემუშავებას, როგორც ეს ადრე იდენტიფიცირებული გენეტიკური ვარიანტებით შეძლეს.

ამ ახალ კვლევაში აღმოაჩინეს კოლექცია 16 გენეტიკური ვარიანტისა, რომელიც, როგორც ჩანს, ზღუდავს აივ-ის რეპლიკაციას. კვლევაში მონაწილეები ატარებდნენ HIV-1-ს — ვირუსის ყველაზე გავრცელებულ ფორმას.

ვარიანტები გროვდებოდა 1-ელ ქრომოსომაზე არსებული გენის ირგვლივ, სახელწოდებით CHD1L. ვარიანტების სიაში ლიდერობდა ერთი კონკრეტული გენეტიკური ჩანაცვლება, რომელიც დაკავშირებულია ვირუსის დაბალ დონესთან ინფექციის ყველაზე ქრონიკულ პერიოდში. ეს კარგი ამბავია, რადგან ეს დონე არის გადაცემის რისკისა და დაავადების პროგრესირების ალბათობის მაჩვენებელი ქრონიკული აივ ინფექციების დროს.

კვლევის ავტორების თქმით, აფრიკული წარმოშობის ადამიანების 4-დან 13%-მდე CHD1L-ის უმაღლესი რანგის ვარიანტს ატარებს.

მკვლევრებმა ჯერ არ იციან, როგორ აკონტროლებს CHD1L ვირუსულ დატვირთვას, მაგრამ ამ საკითხის გარკვევამ, შესაძლოა, მკურნალობის ახალი ვარიანტების შემუშავებას ჩაუყაროს საფუძველი.