ომბუდსმენის ცნობით, სახალხო დამცველის ექსპერტთა ჯგუფმა შეისწავლა და გაანალიზა ექსპრეზიდენტის ჯანმრთელობის მართვის შესახებ კლინიკა ვივამედის მიერ მოწოდებული დოკუმენტები.

დეტალები: სპეციალისტთა შეფასებით, პაციენტის ნევროლოგიური სტატუსი პრაქტიკულად უცვლელია. ნათქვამია, რომ კვლავ ვლინდება კოგნიტური დეფიციტი, ატაქსია, პიპესთეზია, ძალის დიფუზური დაქვეითება.

  • საუბარია იმაზე, რომ გამოხატულია მიკროციტარული ანემია, რომელიც ღრმავდება და კლინიკის მიერ იმართება სისხლის და მისი პროდუქტების ინფუზიით.
  • "თუ გავითვალისწინებთ 2023 წლის 22-23 მაისის მონაცემებს, ჰემატოკრიტი იყო 22%, რეტიკულოციტები 0,5% (5‰), რაც მიუთითებს, რომ რეტიკულოციების პროდუქციის ინდექსი 0,1 და მაღალი ალბათობით ნიშნავს ძვლის ტვინის არაადეკვატურ პასუხს. ექსპერტთა ჯგუფი ფიქრობს, რომ ასეთი მონაცემები მომატებული ფერიტინის და ნორმალური რკინის ფონზე ქრონიკული დაავადების (ამ შემთხვევაში პროტეინდეფიციტური მალნუტრიციის — შიმშილის) მიმანიშნებელია. ამაზე მეტყველებს ჰიპოპროტეინემიაც და ჰიპოფიბრინოგენემიაც".
  • ექსპერტების შეფასებით, კვების დეფიციტის გამოხატულებაა ელექტროლიტური დისბალანსიც.

რაც შეეხება კლინიკაში მართვას, ამბობენ, რომ ამ მხრივ, განსაკუთრებული შენიშვნები არ აქვთ — "გრძელდება სიმპტომური მკურნალობა, რაც მათი მხრიდან პრაგმატულ მიდგომას წარმოადგენს.

  • "პაციენტის მდგომარეობას მკურნალი ექიმები აფასებენ სტაბილურად, საყურადღებოდ, საშუალო სიმძიმედ (მხოლოდ ერთ ჩანაწერში (31.05.2023) ფიგურირებს, რომ მდგომარეობა კვლავ მძიმე რჩება )".
  • საგულისხმოდ მიიჩნევენ იმას, რომ 14 ივლისის შემდეგ აღინიშნება ლეიკოციტების შემცირება (ლეიკოპენია) რაც შეიძლება იყოს, ასევე, ტვინის სუპრესიის შედეგი.
  • "თუ ეს ტენდენცია ნარჩუნდება და არ არის დათვლის ტექნიკური პრობლემა, მაშინ ეს ნიშნავს, რომ ძვლის ტვინის სუპრესია ამჟამად უფრო მკვეთრად არის გამოხატული, ვიდრე მანამდე იყო, რაც მთლიანობაში მდგომარეობის გაუარესების ნიშანია".
  • კონსილიუმი მიუთითებს, რომ ლეიკოპენიის ალტერნატიული პრობლემა, ასევე, შეიძლება იყოს B12 და ფოლიუმის დეფიციტი, როგორც მალნუტრიციის შედეგი, რაც, ამ თვალსაზრისით, მდგომარეობის გაუარესებაზე მიუთითებს.
  • ექსპერტთა ჯგუფს მიაჩნია, რომ საერთო ჯამში, ნარჩუნდება თანდათანობითი ნელი დინამიკა გაუარესებისკენ, და ამბობენ, რომ ეს ჯგუფის მიერ გაკეთებული წინამდებარე დასკვნების შემდეგ სავსებით ლოგიკურია.