კოალიცია მწუხარებს გამოთქვამს და უსამძიმრებს შოვში მომხდარი ტრაგედიის შედეგად გარდაცვლილთა ოჯახის წევრებს, ახლობლებსა და მეგობრებს.

  • შემდეგ კი მიუთითებს, რომ სწორედ ასეთ მძიმე დღეებში განსაკუთრებით მნიშვნელოვანია მედიის საქმიანობა და საზოგადოებისთვის ობიექტური და მიუკერძოებელი ინფორმაციის მიწოდება.
  • სამწუხაროს უწოდებენ იმას, რომ ამ დღეებში კიდევ ერთხელ გავხდით მოწმე ხელისუფლების მცდელობებისა, გააჩუმოს და დააშინოს ჟურნალისტები, რომლებიც პროფესიულ მოვალეობას ასრულებენ.
  • აღნიშნავენ, რომ ეს თავდასხმები გამოხატვისა და პრესის თავისუფლების აშკარა დარღვევაა და გელა მთილიშვილის წინააღმდეგ აგორებულ კამპანიაზე საუბრობენ.
  • "მთის ამბების რედაქტორი, გელა მთივლიშვილი, ერთ-ერთი პირველი მედიის წარმომადგენელი იყო, რომელიც საზოგადოებას შოვში მომხდარი სტიქიური უბედურების შესახებ ინფორმაციას აწვდიდა. გელა მთივლიშვილს საჯარო მოხელე "წყალში გადაგდებით" მხოლოდ იმიტომ დაემუქრა, რომ ის სტიქიას აშუქებს. გელა მთივლიშვილის განცხადებით, აგრესია მათ მიმართ მხოლოდ მას შემდეგ გაჩნდა, რაც მმართველი პარტიის თავმჯდომარემ, ირაკლი კობახიძემ, "არაკაცი" უწოდა, ხოლო პარლამენტის სპიკერმა, შალვა პაპუაშვილმა, პოსტის წაშლაზე მიუთითა. ასევე მიმდინარეობდა გელა მთივლიშვილის მიზანმიმართული დისკრედიტაცია", — ვკითხულობთ განცხადებაში.

დეტალები: საუბრობენ იმაზე, რომ ამის შემდეგ ხელისუფლებამ გადაწყვიტა შოვში პოლიციას მედიის წარმომადგენლები აღარ შეეშვა.

  • მედიის ადვოკატირების კოალიცია გმობს ხელისუფლების მხრიდან სიტყვიერი თავდასხმების, შეურაცხყოფების, დეზინფორმაციისა და საქმიანობაში უკანონო ჩარევის ბოლო შემთხვევებს.
  • "სტიქიური უბედურების დროს გელა მთივლიშვილმა და მისმა კოლეგებმა მნიშვნელოვანი როლი შეასრულეს და დღესაც ასრულებენ საზოგადოების ინფორმირებაში შოვში არსებული სიტუაციისა და ხელისუფლების მიერ სტიქიური უბედურების პრევენციისა და დაზარალებულების დახმარების შესახებ".
  • მათი შეფასებით, ხელისუფლების თავდასხმები მედიაზე არის მიზანმიმართული მცდელობა, გააკონტროლოს ინფორმაციის ნაკადი, რაც გამოხატვისა და პრესის თავისუფლების უფლებას არღვევს.
  • მოუწოდებენ მმართველ პარტიას, დაუყოვნებლივ შეწყვიტოს თავდასხმები მედიაზე და პატივი სცეს გამოხატვის თავისუფლებას, ასევე, მისცეს მედიას საქმიანობის თავისუფლად განხორციელების შესაძლებლობა.