შინაგან საქმეთა სამინისტროს განცხადებით, საქართველოს ადმინისტრაციულ სამართალდარღვევათა კოდექსის 119-ე მუხლის მე-7 ნაწილში, რომელიც ბუნებრივი აირის სისტემაზე მომუშავე სატრანსპორტო საშუალებების საკითხს არეგულირებს, არანაირი საკანონმდებლო ცვლილება არ განხორციელებულა.

ასევე, შსს აცხადებს, რომ არ შეცვლილა საპატრულო პოლიციის აქამდე არსებული მიდგომა ბუნებრივი აირის სისტემის მქონე სატრანსპორტო საშუალებებთან დაკავშირებით.

უწყების ცნობით, ტექდათვალიერების სისტემის ამოქმედებამდე და სტანდარტების განსაზღვრამდე, ბუნებრივ აირზე მომუშავე სატრანსპორტო საშუალებების მძღოლები ისარგებლებენ ისეთივე სამართლებრივი რეჟიმით, როგორც ეს იყო 2017 წლის პირველ ივლისამდე და მათ ქულების შემცირება არ შეეხებათ.

გამონაკლისია იმ სატრანსპორტო საშუალებების მძღოლები, რომელთა ავტომობილები ექვემდებარებიან სავალდებულო ტექდათვალიერებას.