ტიკტოკზე ახალი ტრენდი გავრცელდა, რომელსაც "ბარბის ტესტადაც" მოიხსენიებენ და წერენ, რომ ბიჭის გაცნობისას პირველი მას სწორედ ის უნდა ჰკითხო, ბარბის ფილმზე რას ფიქრობს. სოციალური ქსელის მომხმარებლები ამბობენ, რომ გრეტა გერვიგის ახალი ფილმით მარტივად შეამოწმებ, ღირს თუ არა შენს პარტნიორ კაცთან ურთიერთობის გაგრძელება — თუ მზად არაა, ბარბის სანახავად შენთან ერთად წამოვიდეს, ეს ე.წ. წითელ დროშადაც შეგვიძლია ჩავთვალოთ, ანუ გამოცდა ვერ ჩააბარა და მასთან ურთიერთობაც არ ღირს.

ტრენდი რამდენიმე დღის წინ ტიკტოკზე გამოქვეყნებული ვიდეოთი დაიწყო, რომელშიც ერთ-ერთი მომხმარებელი წერს, რომ კაცის რეაქცია ბარბიზე მის პიროვნებაზე ძალიან ბევრს ამბობს და ამით თქვენი ურთიერთობის სამომავლო პერსპექტივაც კი შეგიძლიათ შეაფასოთ.

"როგორი რეაქცია აქვს შენს პარტნიორ კაცს, როცა ეუბნები, რომ ბარბიზე მასთან ერთად წასვლა გინდა? სიუჟეტზე და პერსონაჟებზე რას ფიქრობს? ფილმის მთავარ სათქმელზე მსჯელობა შეუძლია?" — წერს ვიდეოს ავტორი.

ავტორის იდეა სხვა მომხმარებლებს მართლაც გამოადგათ და კომენტარებში იმასაც მოყვნენ, როგორ შეაფასეს მათმა შეყვარებულებმა ბარბი. მაგალითად, ერთ-ერთი წერდა, რომ მის პარტნიორს ფილმის ყურებისას ჩაეძინა და ხვრინვა ამოუშვა. მეორე საპირისპიროს ჰყვება — მისმა შეყვარებულმა თავადვე გამოთქვა ბარბიზე წასვლის სურვილი. ერთ-ერთი მომხმარებლის პარტნიორმა კაცმა კი ფილმზე მასთან ერთად იტირა.

"ბარბიზე წასვლის საუკეთესო ნაწილი ის იყო, რომ ჩემი შეყვარებული ვარდისფერ ტანსაცმელში გამოეწყო, ფილმის ყველა ხუმრობას მიხვდა და ბოლოს ისიც მითხრა, ალბათ, ქალად ყოფნა ძალიან რთულიაო", — წერს ერთ-ერთი მომხმარებელი.

მიუხედავად იმისა, რომ ვიდეო ვირუსულად გავრცელდა და ათასობით დადებითი გამოხმაურება მოჰყვა, პოსტის ავტორს ზოგიერთი მომხმარებელი არ ეთანხმება და იმასაც ამბობს, რომ ფილმის გარშემო ატეხილი ობსესია მეტისმეტია. ზოგიერთი კი პირიქით, წერს, რომ ბარბიზე არამხოლოდ შეყვარებული, არამედ სხვა ახლობელი კაცებიც უნდა წაიყვანონ, მათ შორის, ძმები, მამები და მეგობრები, რათა მათ რეაქციას დააკვირდნენ.

ბარბის პრემიერა 21 ივლისს შედგა და მაყურებლების მოლოდინიც გაამართლა. გამოსვლიდან ორ დღეში ფილმის შემოსავალმა $155 მილიონი შეადგინა. გრეტა გერვიგის ბარბის ქალი რეჟისორების ფილმებიდან კომერციულად ყველაზე წარმატებული პრემიერა ჰქონდა.

ამავე თემაზე: