ცნობილი ირლანდიელი მომღერალი შინეიდ ო'კონორი 56 წლის ასაკში გარდაიცვალა. ინფორმაციას ოჯახის ცნობაზე დაყრდნობით ირლანდიის საზოგადოებრივი მაუწყებელი ავრცელებს.

"დიდი მწუხარებით გაცნობებთ, რომ ჩვენი საყვარელი შინეიდი გარდაიცვალა. მისი ოჯახის წევრები და მეგობრები შეძრულნი ვართ", — წერია მომღერლის ოჯახის გავრცელებულ განცხადებაში.

ო'კონორის გარდაცვალების მიზეზი ჯერჯერობით უცნობია.

ფოტო: Frans Schellekens / Redferns

დუბლინელმა შინეიდ ო'კონორმა მუსიკალური კარიერა 1980-იანი წლების მეორე ნახევარში დაიწყო, როცა სადებიუტო ალბომი The Lion and the Cobra გამოუშვა. ალბომი არაერთი ქვეყნის ჩარტებში აღმოჩნდა. არანაკლებ წარმატებული გამოდგა 1990 წელს გამოშვებული მეორე სტუდიური ალბომი I Do Not Want What I Haven't Got, რომლის შვიდ მილიონზე მეტი ასლი გაიყიდა მსოფლიოში. ერთ-ერთი სინგლი ალბომიდან — Nothing Compares 2 U — რომელიც პრინსის დაწერილია, მოგვიანებით ნამდვილი ჰიტი გახდა. ბილბორდის მუსიკალურ დაჯილდოებაზე სიმღერა წლის #1 მსოფლიო სინგლად დასახელდა.

კარიერული წარმატების მიუხედავად, ო'კონორს მეტად რთული პირადი ცხოვრება ჰქონდა. მომღერალი იხსენებდა, რომ ბავშვობაში, მისი მშობლების დაშორების შემდეგ, დედა მასზე ფიზიკურად ძალადობდა. მუსიკოსი ღიად საუბრობდა მენტალურ ჯანმრთელობასთან დაკავშირებულ პრობლემებზეც. გასული წლის დასაწყისში ო'კონორს 17 წლის შვილი დაეღუპა, რის შემდეგაც იგი საავადმყოფოში მოხვდა.

მიუხედავად სირთულეებისა, მუსიკოსმა სულ ცოტა ხნის წინ თავის გულშემატკივარს აცნობა, რომ 23 წლის შემდეგ ლონდონში საცხოვრებლად დაბრუნდა და ალბომზე მუშაობას ასრულებდა. ახალი ალბომის გამოშვებასთან ერთად, 2024 წლიდან ო'კონორი მსოფლიო ტურნეს დაწყებასაც გეგმავდა.