საქართველოში ერთ-ერთი ყველაზე ძველი კერძო სტამბა და გამომცემლობა — საქართველოს მაცნე, თიბისის მხარდაჭერით კიდევ ერთ ფილიალს გახსნის.

კომპანიის დამფუძნებლისა და დირექტორის ლევან ფოფხაძის თქმით, წიგნების გამოცემით 90-იანი წლების დასაწყისში დაინტერესდა, ჯერ კიდევ მაშინ, როცა არც კერძო გამომცემლობები არსებობდა და არც სტამბები, წიგნების გამოსაცემად სახელმწიფო გამომცემლობასთან უნდა გეთანამშრომლა.

"ამიტომ, გამომცემლობა განათლებას გავურიგდი და მათთან ერთად დავიწყეთ მხატვრული ლიტერატურის გამოცემა. იმ წლებში დაახლოებით 30 წიგნი გამოვეცით, ძირითადად მხატვრული ლიტერატურა. საქმე უკან მას შემდეგ წავიდა, რაც კუპონები შემოვიდა და ინფლაცია დაიწყო. ამან დიდი თანხები დაგვაკარგვინა. ამიტომ გადავწყვიტეთ, დარჩენილი რესურსით პოლიგრაფიული საქმიანობა დაგვეწყო", — იხსენებს ლევანი.

ლევან ფოფხაძე ჰყვება, რომ 1996 წელს 100მ2 ფართი და რამდენიმე დანადგარი იჯარით აიღეს და დაიწყეს წიგნების ბეჭდვა. იმ დროისთვის კერძო გამომცემლობებიც გაჩნდა და როგორც საკუთარი გამომცემლობისთვის, ისე მათთვისაც ბეჭდავდნენ.

"საქმე კარგად წავიდა და მალევე გავხსენით კიდევ რამდენიმე, უკვე შედარებით დიდი ფილიალი და გავაფართოვეთ როგორც სტამბა, ასევე გამომცემლობაც. იქიდან მოყოლებული, ვბეჭდავთ და გამოვცემთ ძირითადად სასკოლო სახელმძღვანელოებს, სასკოლო დამხმარე ლიტერატურას, ასევე მხატვრულ, საბავშვო და სამეცნიერო შემეცნებით ლიტერატურასაც", — ამბობს ლევანი.

კომპანიის დამფუძნებლის თქმით, მონაწილეობდნენ სხვადასხვა კონკურსებშიც და ისე მოხდა, რომ 2008 წლამდე კერძო კომპანიებს შორის ყველაზე მეტი დასახელების, 67 წიგნი ჰქონდათ გამოცემული.

"2012 წლიდან ეს კონკურსები შეწყდა. 2018 წელს კი, მათი განახლებისთანავე, ისევ ჩავერთეთ კონკურსებში და მას შემდეგ თითქმის ყოველ წელს, საქართველოს მაცნის მიერ დაბეჭდილ და გამოცემულ რამდენიმე სახელმძღვანელოს ენიჭება გრიფი. წელს გრიფი მიენიჭა XI კლასის ფიზიკის და ქიმიის, პირველი და მეორე კლასის ქართული ენისა და ლიტერატურის, ასევე პირველი და მეორე კლასების ჭადრაკის სახელმძღვანელოებს", — აღნიშნავს ლევანი.

დღეისათვის, თბილისსა და წეროვანში სტამბა საქართველოს მაცნის უკვე 5 შენობაა განლაგებული. მეხუთე, 1100მ2 ფართის შენობა კი თიბისის მხარდაჭერით ააშენეს და აღჭურვეს უმაღლესი ხარისხის დანადგარებით.

"სტამბაში სტაბილურად 40 ადამიანია დასაქმებული, თუმცა "ცხელ თვეებში", როცა დიდი რაოდენობით შეკვეთები გვაქვს მოსასწრები, დაახლოებით 15 ადამიანს ვამატებთ. გამომცემლობაში 15 დასაქმებულია. მოთხოვნა სასკოლო სახელმძღვანელოებზე საკმაოდ დიდია. ჩვენი მიზანია, მოკლე დროში რაც შეიძლება მეტი წიგნის ბეჭდვა შევძლოთ, ამიტომ ამ ეტაპზე აქტიურად ვმუშაობთ იმაზე, რომ კიდევ უფრო გავზარდოთ დანადგარების რაოდენობა და შესაბამისად, სიმძლავრეც, რაშიც, რა თქმა უნდა, ისევ თიბისის მხარდაჭერის იმედი გვაქვს".